Mika 5 - Mukanda Wa Zambi 1970

¹ Yenu akwa Yerusaleme, kungululenu tujita twenu! Haatuseleka! Kaanase jita ni mwata wa Israele!

Zambi yalakenya Aisraele umwe mukwa kuyula wa ku Betleheme

² Mwene Zambi ngwenyi: “Yena Betleheme Efrata, uli mukepe kuhiana mukachi ka membo ja Yuda, alioze muli yena mungukatuhwisa umwe mukwa kuyula wa Aisraele. Kwalula cha akwa jiko lienyi chinayi ndoo ku shakulu.”

³ Mwene Zambi makakunjika atu jenyi mu moko ja akwa kole jo ndoo ni kuze semi makasema mwanenyi wa lunga. Hohene usoko wenyi, waze te atwama mu chifuchi cha mbala mu undungo maakakunguluka nawa hamwe ni atu jo ene.

⁴ Muze mwe lunga makeza, makayula atu jenyi ni tachi ni ulamba ya kuli Mwene Zambi. Atu jenyi maakatwama mu sambukila mumu hashi heswe atu maakatayiza unene wenyi,

⁵ neye makaneha uhwimino. Muze Aasuria maakanjila mu chifuchi chetu ni kukumba membo jetu akukoleka, mutukatuma miata jetu a hamu kuhiana kulimika no.

Utuswilo ni ubatwilo

⁶ Muze Aasuria maakanjila mu chifuchi chetu, tujita twetu maakaakumba, maakatulamwina ku moko jo.

⁷ Aisraele waze maakasala ni mwono maakabwa ngwe mume uze Mwene Zambi hatuma hali mavungu anji, ngwe vula ku yibuta. Maakashachila hali Zambi, hi hali atu ko.

⁸ Waze maakasala mukachi ka mavungu maakabwa ngwe tambwe yoze unazombo mu usaki hanji mu chililo ni kufupa yakulia. Makanjila mukachi ka mapanga, makachinyangila hali ayo ni kwapapulula yihanda yihanda, niumwe kechi kaapulula.

⁹ Aisraele maakakumba akwa kole jo ni kwoonona eswe.

¹⁰ Mwene Zambi ngwenyi: “Ha matangwa waze mungukachiza tuvwalu twenu ni kwenyeka matemba jenu.

¹¹ Mungukenyeka membo a mu chifuchi chenu ni kubuzwila yipanga yenu hashi.

¹² Mungukachiza wanga mu chifuchi chenu, kunuchi kabwa nawa ni tahi.

¹³ Mungukabalwola tuponya twenu ni manguji a mawe a chijila; kunuchi kakombelela nawa yuma yize nwakulinga yenwene.

¹⁴ Mungukanungwina hashi mahamba jenu ja zambi wa pwo Ashera, ni kwonona membo jenu.

¹⁵ Mungukakala ni ufwatulo wami unji mavungu eswe waze keeshi kungwononokena.”