Mika 4 - Mukanda Wa Zambi 1970

Uhwimino hashi heswe mu chiyulo cha Zambi

¹ Ha matangwa akusula mulundu wa zuwo lia Zambi muubwa mulundu usuku kuhiana milundu yikwo yeswe. Mavungu anji maakeza ko;

² mba maakamba ngwo: “Tukundamenu ha mulundu wa Mwene Zambi, ku zuwo lia Zambi ya Aisraele. Maakatulongesa chize anazange tulinge; mutukendangana mu majila jenyi. Mumu longeso lia Mwene Zambi liakukatuka ku Yerusaleme; ku Zione kakuhanjika ni atu jenyi.”

³ Iye makabatula milonga ya mavungu, mavungu a lufuma a hakamwihi ni kusuku. No maakalumuna mikwale yo kubwa matemo a kulima no, ni makunga jo kubwa poko ja milimo. Mavungu keechi kwasa nawa jita, chibwe kulilongesa yo.

⁴ Mutu mweswe makatwama mu uhwimino mushi lia mitondo yenyi ya vinyu ni ya mikuyu, kukuchi kabwa niumwe yoze makamuvwisa woma. Mwene Zambi Mukwa Ndundo Jeswe hanachilakenya.

⁵ Vungu ni vungu kakuwayila ni kwononokena zambi yo, alioze yetu twakuwayila ni kwononokena Mwene Zambi, Zambi yetu, ku miaka yeswe ni miaka yeswe.

Aisraele maakakatuka mu undungo

⁶ Mwene Zambi ngwenyi: “Tangwa kulineza lize mungukakunga atu eswe waze namwesene lamba, waze amwene lamba mu undungo mu chifuchi cha mbala.

⁷ Kaali yilema, kaali kusuku ni ku mahio, alioze mungubutula nawa ni waze asalile, mungukaapwisa vungu lia lufuma. Mungukaayula ha mulundu wa Zione, chize ku tangwa lize ndoo ku miaka yeswe.”

⁸ Yena Yerusaleme, muma muze Zambi akufungila atu jenyi ngwe kafunga ka mapanga, kumuukabwa nawa limbo lia wanangana uze wabwile niwe.

⁹ Mumu yika unakololokela chocho ni liji linene? Mumu yika unamwena lamba ngwe pwo yoze Unevu musongo wa kusema? Kuushi ni mwanangana ni akwa kuyula je haanafu, nyi?

¹⁰ Binda, utete, yena Zione, ngwe pwo yoze unafumbajala ha kusema, mumu munukatuka mu limbo, munutwama mu chana. Muuya ku Babilone, alioze kwenako Zambi makakulamwina kuli akwa kole je.

¹¹ Mavungu anji haanalikungulula alimike ni yena. Kwamba cho ngwo: “Yerusaleme chatamba kumwonona! Limbo lino tulienyeke!”

¹² Alioze mavungu wano keeshi kunyingika manyonga ja Mwene Zambi. Keeshi kunyingika ngwo, Mwene Zambi kakwakunga hamuwika ngwe chize akukunga mbuto hanga ayizungule.

¹³ Mwene Zambi ngwenyi: “Yenu akwa Yerusaleme, yeenu numwese akwa kole jenu lamba! Yami mungukanutakamisa ngwe kuji a mbau yoze uli ni mbinga ja utale ni sende ja unengu. Munukawonda mavungu anji, ubite uze abubile mu jita munukangulambula wo yami Mwene Zambi ya hashi heswe.”