Mika 3 - Mukanda Wa Zambi 1970

Mika yahisa miata ja Aisraele

¹ Ivwenu yenu miata ja Aisraele! Chanutamba kuyula ni ululi,

² hindu nwakuvutwokela ululi, nwakuzanga ungulungulu. Nwakuzunwona atu jami ni mwono wo ni kusunwona misunya ya ku yifwaha yo.

³ Nwakuumbula atu jami. Nwakuzununa makowa jo, nwakumakwona yifwaha yo, ngwe yifwo ya mu ndeho (yimbia).

⁴ Tangwa kulineza lize munukololoka kuli Mwene Zambi, alioze kechi kunukumbulula nichimwe. Kechi kubanjika ku yilemba yenu, mumu ha ungulungulu wenu.

⁵ Akwa munanyi kaakwonga atu jami. Kaakulakenya uhwimino kuli waze akwafweta, alioze kaakululika jita ni waze keeshi kwafweta. Mwene Zambi kanambila akwa munanyi waze ngwenyi:

⁶ “Yenu akwa munanyi, tangwa lienu hiliasala hakepe litoke, mumu nwakupiangula atu jami. Kunuchi kumona nawa Usolwelo wa munanyi, kunuchi kulongesa nawa Chuma nichimwe.”

⁷ Waze akulongesa yuma yize muyiza ho, sonyi meevwa mumu ha kuhona cho; eswe kumaahetama mumu Zambi keshi kwakumbulula.

⁸ Alioze hakutwala kuli yami, Mika, Mwene Zambi kakunguzalisa ni Mwiku wenyi wa tachi. Hangwaha yinyingi ya ululi ni hamu lia kulweza Aisraele milonga yo.

⁹ Yenu miata ja Aisraele, ngubanjikenu yenu waze nwakuvutwokela ululi ni kwalumuna yibema kubwa yibi.

¹⁰ Nunatungu limbo lia Zambi, Yerusaleme, ha fundamentu ya manyinga ni utanguko.

¹¹ Miata ja limbo kaakuyula mumu ha mbongo ja mbenga, mahako kaakulongesa Shimbi ja Zambi hanga aafwete, akwa munanyi kaakulumbununa Usolwelo wo mumu ha ubite. Hindu ayo eswe kaakwamba ngwo: “Mwene Zambi kali hamwe ni yetu. Chibi nichimwe kuchichi kutuwana.”

¹² Zione kumaamulima ngwe minda mumu hali yenu. Yerusaleme kumabwa mulumba wa kwenyeka. Mulundu wa zuwo lia Zambi kumuwalumuka usaki.