Mika 2 - Mukanda Wa Zambi 1970

Lamba lize maamona akwa kubinjisa yiswale

¹ Lamba linji mulikabwa hali waze akunongama ni kululika alinge yibi! Muze hikwacha kaakuya hazehene ni kulinga ungulungulu uze anyonganga,

² Muze akwivwa lwahu wa minda, kaakuyifutukila. Muze akwivwa lwahu wa mazuwo, kaakwatambula. Chibwe akwa jiko ni yuma ya mutu kuyishi kubwa kanawa.

³ Kashika Mwene Zambi kanambe ngwenyi: “Ngunalulika kunumwesa lamba, kunuchi kuhasa kulichina. Kumunubwa mu ubinjilo, mba kunuchi kwenda nawa nikulisuta nihakepe.

⁴ Muze tangwa lize hilieza, sango jenu mujibwa ngwe kashilikilo ka lamba. Mba atu maanwimbila mwaso uno wa lungungu: Mama yamie, atwonona lume! Mwene Zambi hanatambula chifuchi chetu, hanachihana kuli waze atukwachile funge.”

⁵ Kashika muze tangwa hiliaheta lia kuhilwisa chifuchi kuli atu ja Mwene Zambi, yenu kunuchi katambula chitundo nichimwe.

⁶ Atu kaakungwamba ngwo: “Kanda utulongesa. Kanda ulongesa hakutwala ku yize yeswe. Zambi kechi kutuvwisa sonyi.

⁷ Kuma yena Unanyongo ngwe, Zambi hatushinga, nyi? Keshi kulihumikiza ni yetu, nyi? Kuma malinga yuma ngwe yino, nyi? Keshi kuhanjika ni zango kuli waze akulinga yibema, nyi?”

⁸ Mwene Zambi yakumbulula ngwenyi: “kwakwasa jita ni atu jami ngwe kaali akwa kole. Atu kaanakatuka ku jita ni kuhiluka ku mahiahia jo nikunyonga ngwo, kaali mu uhwimino. Alioze kwenako nunaaswamina hanga nwiye mahina waze anazala.

⁹ Nwakuhuma mapwo ja atu jami akatuke ku mahio kuze heejilila; nwakukinda ana jo kutambula yiwape yami.

¹⁰ Katukenu, yeenu; kuno kukushi uhwimino nihakepe. Akwa kole moonona homa hano mumu ha milonga yenu.

¹¹ “Atu wano kaakuzanga mukwa munanyi weka wa mahuza, yoze wakwoonga ni kwalongesa ngwenyi: ‘Ngunahanjika munanyi ngwami, vinyu muyinupukumukina.’

¹² “Alioze yami mungunukungulula hamuwika, yenu Aisraele eswe hinwasala. Mungunukungulula ngwe chize akuutama mapanga waze anahiluka ku matanga jo. Ngwe chize chililo chakuzala ni mapanga, Chenacho chifuchi chenu muchizala nawa ni atu.”

¹³ Zambi makazulwila atu jila ni kwatuhwisa mu undungo mu chifuchi cha mbala. Kumaakatuhuka ku yajilo ya limbo nikutusuka. Mwene Zambi, mwanangana wo, iye mwene makaasongwela.