Mika 1 - Mukanda Wa Zambi 1970

¹ Ha matangwa ja Jotame, ni Ahaze, ni Hezekia mianangana ja Yuda, Mwene Zambi yalweza maliji wano kuli Mika, wa ku limbo lia Moreshete. Yamulweza Usolwelo wa yuma yino yeswe hakutwala ku membo ja Samaria ni Yerusaleme.

Mwaso wa lungungu mumu ha Samaria ni Yerusaleme

² Ivwenu chino, yenu mavungu eswe; banjikenu, yenu akwa hashi heswe! Mwene Zambi manusuma mulonga. Banjikenu! Kanahanjikila mwilu mu zuwo lienyi.

³ Mwene Zambi kanakatuka homa lienyi lia chijila; mahulumuka ni kwenda helu lia milundu.

⁴ Mba milundu muyisangunuka ngwe chize yakusangunuka Sela ni kahia; muyimwangana mu yikulo ngwe chize meya akusulumioka ha milundu.

⁵ Yino yeswe muyibwa mumu Aisraele haanavulumuna, haanakatukila Zambi. Iya wakokelele Aisraele uhulia uno? Ngwami, Samaria, lie limbo lia wanangana! Iya hananjisa mahamba mu Yuda? Ngwami, mwe Yerusaleme iye mwene!

⁶ Kashika Mwene Zambi unambe ngwenyi: “Samaria mungumupwisa mulumba wakwenyeka mu chana, homa ha kutumba vinyu. Mungulumbika mawe a lie limbo kwe ku chikulo, mungufukula fundamentu jalio.

⁷ Mahamba jamo a ndando yinji maakaabalwola yipinji yipinji, yuma yenyi yeswe yize ahanyine kuli yitanji a mu zuwo lio liakuwayila maayocha kahia, tuponya twenyi eswe kumaalumbika hashi. Samaria hanayuku yuma yino mu kuwayila chenyi chakwokesa mbuto jenyi ni ana jenyi. Haliabwila akwa kole jenyi kumaaya nayo ni kuyikombelela kweswako.”

⁸ Hohene Mika yamba ngwenyi: “Mungunenganyana ni kulila. Ha kusolola chinyengo chami, munguzula mahina ni sapato, mungwenda uselesele. Mungubwoza ngwe mukuza, mungushikwoka ngwe kajila otrishe.

⁹ Yilonda ya Samaria keechi kuhasa kuyiwuka. Ayuda no maamona lamba chizechene. Kwonona hichaheta ndoo ku yajilo ya Yerusaleme muze mwatwama atu jami.”

Akwa kole yaakundama ku Yerusaleme

¹⁰ Kanda nulweza akwa kole jetu a Gate chize atu haatukumba, kanda amona chize tunalili. Yenu akwa Bete Leafra, lilangumunenu mu fufuta!

¹¹ Yenu akwa Shafire, yeenu kwenu mu undungo mu chifuchi cha mbala, yeenu uselesele, nwivwe sonyi. Waze atwama mu Zanana keechi kuhamuka nikutuhuka mu limbo lio. Muze munwivwa mbimbi mu Betezele mba mununyingika ngwenu, kuma uhwimino kuushiko.

¹² Akwa Marote kaanashimbwila ni kuyambashana amone yoze maakwasa kama, mumu Mwene Zambi haneha lamba ndoo ku chikolo cha Yerusaleme.

¹³ Yenu akwa Lakishi, kashilenu tuvwalu ku matemba jenu. Nwembulwile ndako jibi ja Israele, kashika nwavulumwishine Yerusaleme.

¹⁴ Yenu Ayuda, shikenu akwa limbo lia Moreshete Gate. Mianangana ja Israele, limbo lia Akzibe keechi kunukwasa.

¹⁵ Yenu akwa Maresha, Mwene Zambi manukunjika mu moko ja umwe mukwa kole yoze matambula limbo lienu. Akwa lutwe a lufuma ja Israele kumaaya ni kuswama mu chivwenge cha Adulame.

¹⁶ Yenu tewulenu tuwewe mumu hali ana jenu waze nwazanga. Lipwisenu akwa lwole, mumu ana jenu kumaakaatwala mu undungo mu chifuchi cha mbala.