Miaso (Masamu) 98 - Mukanda Wa Zambi 1970Zambi kali mukwa kuyula hashi heswe 1 Mwimbilenu Mwene Zambi mwaso Waha; halinga yikomokeso! Hakumba akwa kole ni kwoko lienyi lia linanga lia chindume. 2 Mwene Zambi, hambujola kukumba chenyi; halweza mavungu ndundo jenyi ja kulamwina. 3 Hamanununa chilakenyo chenyi kuli Aisraele, mumu ha umwenemwene wenyi ni zango lienyi lize kulishi kuhwa. Atu eswe a hashi haamona kukumba cha Zambi yetu. 4 Yenu akwa hashi heswe mwimbilenu Mwene Zambi mwaso wa uwahililo. Muchichimiekenu ni miaso, kololokenu ni chiseke! 5 Imbenu nikuhalisa Mwene Zambi! Mwimbilenu miaso ni tulialia! 6 Imbenu yitavwi, kololokenu ni chiseke ku meso ja Mwene Zambi, mwanangana wetu! 7 Kalunga lwiji ni yeswe yize yilimo kololokenu! Hashi ni eswe waze aliho imbenu! 8 Yenu njiji sakwilenu! Yenu milundu imbenu miaso ya uwahililo ku meso ja Mwene Zambi, 9 mumu kaneza ni kuyula akwa hashi. Makayula hashi heswe ni ululi ni umwenemwene. |
The Bible in Chokwe © Bible Society of the Democratic Republic of Congo and Bible Society of Zambia, 1970, 1991.
Bible Society of Zambia