Miaso (Masamu) 95 - Mukanda Wa Zambi 1970

Chichimiekenu Mwene Zambi

¹ Tweyenu tuchichimiekenu Mwene Zambi! Tumwimbilenu ni uwahililo mumu kakutulamwina!

² Tuyenu ni kusakwila ku meso jenyi, tumuchichimiekenu ni miaso.

³ Mumu Mwene Zambi kali Zambi wa ndundo, kanahiana mazambi akwo eswe.

⁴ Iye wakuyula hashi heswe, chize kushi lia mavu ndoo ha milundu yisuku yahiana.

⁵ Iye wakuyula meya waze atangile, ni hashi nawa, haze atangile iye mwene.

⁶ Tweyenu, tufukamenu tumuwayile, tusenu makungunwa hashi ku meso ja Mwene Zambi, Tangi yetu.

⁷ Kali Zambi yetu, tuli atu jenyi waze akutala, tuli mapanga jenyi waze akulisa. Banjikenu musono maliji waze anambe ngwenyi:

⁸ “Kanda nukalisa mbunge jenu ngwe chize alingile tushakulu twenu, ku Meriba ni ku Masa mu puya.

⁹ Yaangwesekela ko, chibwe te hamona yeswe yize nalingile.

¹⁰ Yingwevwila kubiha miaka makumi awana, yingwamba ngwami: ‘Haa! Atu wano kaali yihulia! Kaasolo kufunga Shimbi jami.’

¹¹ Yingwivwa ufwatulo, yingulishinga ngwami: ‘Kunuchi kunjila nichimwe mu chifuchi cha uhwimino chize nanulakenyene.’ ”