Miaso (Masamu) 92 - Mukanda Wa Zambi 1970

Chichimiekenu Mwene Zambi

¹ Chinabeme kukusakwilila, yena Mwene Zambi, ni kwimba miaso ni kulemesa jina lie, Zambi Mukwa Mwilu Mwahiana.

² Chichamene cheswe chinabeme kulweza zango lie lize kulishi kuhwa, ni umwenemwene we ufuku weswe.

³ Chinabeme kukuchichimieka ni tulialia eka ni eka!

⁴ Aa Mwene Zambi, yitanga ye ya kukomwesa yakunguwahilisa; kashika nakukwimbila miaso.

⁵ Mwene Zambi, yitanga ye yili ya kulishimwoka! Manyonga je kaali asuku!

⁶ Chihepuke kahashile kuyinyingika; chijingale kahashile kuyilumbununa.

⁷ Yingulungulu maahasa kukola ngwe mwambu, maahasa kutwama kanawa; alioze maakoonona liakulu,

⁸ mumu yena Mwene Zambi uli mwanangana ndoo ku miaka yeswe.

⁹ Tunanyingika ngwetu, akwa kole je kumaakafwa, muukakumba yingulungulu eswe.

¹⁰ Hiwangutakamisa ngwe kuji a ngombe, hiwanguwahilisa.

¹¹ Hingunamono chize akwa kole jami alifwichile, hingunevu nawa kulila cha yingulungulu.

¹² Akwa ululi kumaakakola ngwe mingaji, hanji ngwe mitondo sedru ha milundu ya Libano.

¹³ Kaali ngwe mitondo yize anatumbu ku zuwo lia Mwene Zambi, yakutatuka ku zuwo lia Zambi yetu.

¹⁴ Kuyakwima mihuko chibwe hiyabwa yikulu, yakubwa kwayo ya wisu ni ya tachi matangwa eswe.

¹⁵ Yino yeswe yakulweza ngwo, Mwene Zambi kali mukwa ululi, kali liwe liami, muli iye kumushi uhenge.