Miaso (Masamu) 90 - Mukanda Wa Zambi 1970

Mukanda Wa Muchiwana ( Mia 90—106 ) Zambi ni mutu

¹ Aa Mwene Zambi, chize ku shakulu ndoo ni musono yena uli zuwo lietu lia kuswama.

² Muze te kanda uchitanga milundu ni hashi, chize ku miaka yeswe ndoo ku miaka yeswe yena uli Zambi.

³ Wakuhilwisa akwa hashi ku fufuta. Wakwamba ngwe: “Hilukenu ana ja atu.”

⁴ Ku meso je kanunu ka miaka kali ngwe tangwa limuwika, kali ngwe zau, lize hiliabalika kulu, ngwe ola yimwe ya ufuku.

⁵ Yena wakututwala ngwe sanga lia meya, mwono wetu uli wihi ngwe chilota. Tuli ngwe mwambu uze wakusoka ha chichamene,

⁶ wakukula, mba ha chingoloshi muulekama kwawo.

⁷ Ufwatulo we wakutwonona; utenu we wakutuvwisa mwongo.

⁸ Yibi yetu yakusoloka ku meso je; chibwe yize twakulinga ku tenga.

⁹ Ufwatulo we kuwakukehesa mwono wetu, we mwono uli ngwe liji lia kanyingenyinge.

¹⁰ Twakutwama ni mwono shina miaka makumi shimbiali, hanji makumi nake, nyi tuli ni tachi; alioze miaka yize yili ya lamba ni ya yinyengo wika; Kwasala hakepe tufwe, mba tuye kwetu.

¹¹ Iya hanevu ndundo ja ufwatulo we? Iya Unanyingika mwongo weswe wa utenu we?

¹² Tulongese kama kwalula matangwa jetu, mba hanga tubwe ni mana.

¹³ Aa Mwene Zambi, ndoo tangwa lika muwecha kama kutuvwila ufwatulo? Tuvwile kama keke, yetu tuvumbi twe.

¹⁴ Tangwa ha tangwa tulweze kama zango lie lize kulishi kuhwa, mba tuhase kwimba miaso ni kuwahilila matangwa eswe.

¹⁵ Miaka yinji hiunatumwesa lamba, haliabwila tuwahise ngwe chize watumwesene lamba.

¹⁶ Solola kama kuli yetu tuvumbi twe yitanga ye ya kukomwesa; akwa vungu lietu amone kama ndundo je jahiana.

¹⁷ Mwene Zambi, Zambi yetu, tuwahise kama. Kolesa kama milimo ya moko jetu.