Miaso (Masamu) 9 - Mukanda Wa Zambi 1970

Chichimiekenu Zambi mumu ha ululi wenyi

¹ Mwene Zambi, mungukuchichimieka ni mbunge yami yeswe; mungwambujola yikomokeso yeswe yize hiunalingi.

² Mungukwimbila ni uwahililo. Mungwimba ni kukuhalisa Zambi Mukwa Ndundo Jeswe.

³ Akwa kole jami kaakutewuluka ni kuchina muze wakusoloka, kaakulimbuka hashi, kaakufwa.

⁴ Yena wakubatwila atu ni ululi, yena hiwangusambisa.

⁵ Yena hiwahisa akwa mavungu hiunonwona yingulungulu; keechi keewuluka ndoo ku miaka yeswe.

⁶ Akwa kole jetu hiunaanongesa ku miaka yeswe; hiunenyeka membo jo, keechi keewuluka nawa.

⁷ Alioze Mwene Zambi kali mwanangana wa miaka yeswe; hatwama ha chitwamo chenyi hanga abatwile atu.

⁸ Kakuyula akwa hashi ni mbunge yibema, kakubatwila akwa mavungu ni ululi.

⁹ Mwene Zambi kali ngwe zuwo lisuku lia kukoleka lia waze akuhungumiona, kali chiswamo ha tangwa lia lamba.

¹⁰ Mwene Zambi, waze akukunyingika maashachila hali yena; kuushi kwehuka yoze meza kuli yena.

¹¹ Mwene Zambi kakutwama mu limbo lienyi lia Zione; mwimbilenu ni uhaliso. Ambujolenu kuli mavungu eswe yitanga yenyi.

¹² Zambi kakwiwuluka akwa lamba; keshi kuvulama kulila cho, kakumwesa lamba waze akwalinga yibi.

¹³ Aa Mwene Zambi, nguvwile kama keke! Tala chize akwa kole jami akungumwesa lamba! Aa Mwene Zambi, ngulamwine kama ku kufwa,

¹⁴ hanga nguhase kumana ku meso ja akwa Zione, nikwalweza yeswe yize ngunakuhalishila.

¹⁵ Akwa mavungu haafula wumbu, haaholokela mo; haata muheto, haafwa mo ayo ene.

¹⁶ Mwene Zambi halisolola mu ubatwilo wenyi wa ululi; yingulungulu haakwachika mu yitanga yo ene.

¹⁷ Songo lia yingulungulu eswe ni lia eswe waze akulituna Zambi lili kufwa.

¹⁸ Akwa kuyindama keeshi kwavulama matangwa eswe; chuma chize yiswale akusa mbunge kuchishi kutoka ku miaka yeswe.

¹⁹ Mwene Zambi, tweya! Kanda utayiza atu kukulelesa! Kungulula akwa mavungu ku meso je, waabatwile.

²⁰ Aa Mwene Zambi, akolese woma; anyingike ngwo, tuli lume atu.