Miaso (Masamu) 89 - Mukanda Wa Zambi 1970

Mwaso wa Aisraele ha matangwa a lamba

¹ Aa Mwene Zambi, mungukwimbila matangwa eswe mumu ha zango lie lize kulishi kuhwa; mungwambujola umwenemwene we ndoo ku miaka yeswe.

² Ngunanyingika ngwami, zango kulishi kuhwa ndoo ku miaka yeswe, umwenemwene we muulinduluka ngwe lilu.

³ Hiunambe ngwe: “Hingunakolesa Usendo ni mutu yoze natongwele; hingunalakenya kavumbi kami David ngwami:

⁴ ‘Mungufunga wanangana we ndoo ku miaka yeswe, umuwika wa ku vungu lie mabwa ni kukuhinga ndoo ku miaka yeswe.’ ”

⁵ Mwene Zambi, lilu kuliakwimba hakutwala ku yikomokeso ye, kuliakwimba hakutwala ku umwenemwene we.

⁶ Mwene Zambi, helu lia malelwa iya walifwa ngwe yena? Iya hakachi ka akwa ndundo unalite ni yena?

⁷ Kaakukulemesa mu mbunga ya minangi; eswe kaakukuvwila woma.

⁸ Mwene Zambi, Mukwa Ndundo Jeswe, iya uli ni ndundo ngwe, yena? Aa Mwene Zambi, yena uli mukwa kushishika mu yeswe yize wakulinga.

⁹ Wakuyula kalunga lwiji wa tachi, wakuholesa miavu yenyi ya ufwatulo.

¹⁰ Washihile kashitu yoze munene wa chilianyi Rahabe; yiumwanga akwa kole je ni kwoko lie lia ndundo.

¹¹ Hashi ni lilu niye; yena watangile hashi ni yuma yeswe yize yiliho.

¹² Yena watangile norde ni sude; mulundu wa Tabore ni wa Hermone yaakukwimbila ni uhaliso.

¹³ Yena uli mukwa ndundo! Ndundo je jinahiana!

¹⁴ Wakuyula atu ni ululi ni umwenemwene; yeswe yize wakulinga yinasolola zango lie ni umwenemwene we.

¹⁵ Kaawaha atu waze akukuwayila ni miaso, waze akumona yiwape ye mu mwono wo.

¹⁶ Kaakuwahilila tangwa Heswe mumu hali yena, kaakukuchichimieka mumu ha utu we.

¹⁷ Wakutukwasa kukumba kuhiana, mumu ha zango lie twakukumba.

¹⁸ Aa Mwene Zambi, yena watongwele kafunga ketu, yena munangi wa Aisraele, watuhele mwanangana wetu.

Yuma yize Zambi alakenyene David

¹⁹ Miaka yinji hiyabalika, hiunambila tuvumbi twe akwa kushishika mu Usolwelo ngwe: “Hingunakwase umwe kajita wa lufuma, hingunahana chitwamo cha wanangana kuli mutu yoze natongwele.

²⁰ Hingunapwisa kavumbi kami David mwanangana, ni kumuwayisa maji a chijila.

²¹ Mungubwa hamwe nenyi matangwa eswe ni ndundo jami ngumutakamise.

²² Akwa kole keechi kamukumba, yingulungulu keechi kamuhiana.

²³ Akwa kole jenyi ni eswe waze akumuvutwokela, mungwashiha, mungwaliachila hashi.

²⁴ Mungumuzanga, mungubwa mukwa kushishika; mungumukwasa akumbe matangwa eswe.

²⁵ Wanangana wenyi mungukaupwisa unene, chize ku kalunga lwiji Mediterane ndoo ku lwiji Ufrateze.

²⁶ Makangulweza ngwenyi: ‘Yena uli tata kanda Zambi yami, wakungulamwina ni kungufunga.’

²⁷ Mungukamupwisa mwanami mutangu, mwanangana Wahiana mianangana eswe.

²⁸ Mungukamanununa yilakenyo yami kuli iye matangwa eswe; Usendo uze nakolesele nenyi muulinduluka ndoo ku miaka yeswe.

²⁹ Miaka yeswe umwe wa ku vungu lienyi makabwa mwanangana, wanangana wenyi muukalinduluka ngwe lilu.

³⁰ “Alioze nyi ana jenyi keechi kafunga Shimbi jami, nyi keechi kwenda mu jila yami,

³¹ nyi keechi kafunga yiyulo yami, ni keechi kwononokena longeso liami,

³² mungukaamwesa lamba mumu ha shili yo, mungukaabinjisa mumu ha milonga yo.

³³ Alioze chichi kulitwamina kuzanga David, chichi kwecha kumanununa chize hingunamulakenya.

³⁴ Chichi kushiha Usendo uze hingunakolesa nenyi, chichi kachiza ko chilakenyo nichimwe.

³⁵ “Hingunalishingi ni jina liami lia chijila ngwami: chichi kuhanjika mahuza kuli David nichimwe!

³⁶ Vungu lienyi kulichi kahwa, wanangana wenyi muukalinduluka ngwe tangwa.

³⁷ Muukalinduluka ngwe kakweji, chela wamwenemwene wa mu tetela.”

Lungungu: akwa kole haakumba mwanangana

³⁸ Alioze yena unatenukina mwanangana yoze watongwele, hiwamwehuka, hiwalituna ye.

³⁹ Usendo uze wakolesele nenyi, hiwaushiha, chipangula chenyi cha wanangana hiwachimbila hashi.

⁴⁰ Hiunabubu chipanga cha limbo lienyi, mazuwo jenyi akukoleka hiwaapwisa yikulu.

⁴¹ Yibalibali kaakwiya yuma yenyi, enyembo jenyi kaakumuseha.

⁴² Hiwakwasa akwa kole kumukumba, hiwaawahilisa.

⁴³ Yitwa yenyi ya jita hiwayipwisa yamokomoko, hiwatayiza akwa kole kumukumba.

⁴⁴ Hiwachiza lukanda wenyi wa wanangana, ni kulimbwila chitwamo chenyi hashi.

⁴⁵ Hiwakehesa matangwa jenyi, hiwamuvwisa sonyi kuhiana.

Kulemba: “Mwene Zambi ngulamwine kama”

⁴⁶ Mwene Zambi muukanguswamina ndoo ku miaka yeswe, nyi? ndoo tangwa lika muukalitwamina kungutenukina?

⁴⁷ Iwuluka kama kuhiha cha mwono wami; Iwuluka ngwe, atu eswe kaali lume akwa hashi!

⁴⁸ Iya kechi kafwa? Ngwe kuchi mutu mahasa kuchina kufwa?

⁴⁹ Mwene Zambi, yilihi yiwape yize watulwezele hatangu? Yilihi yilakenyo yize walakenyene David?

⁵⁰ Iwuluka chize atu akungushililika, yami kavumbi ke, chize ngunalihumikiza ni mashingo ja akwa mavungu.

⁵¹ Aa Mwene Zambi, akwa kole je kaakushililika mwanangana yoze watongwele! Kaakumushililika kweswako akuyaya.

⁵² Tuchichimiekenu Mwene Zambi ndoo ku miaka yeswe! Chibwe kama Chenacho! Chibwe kama Chenacho!