Miaso (Masamu) 88 - Mukanda Wa Zambi 1970

Kulemba: “Mwene Zambi ngukwase kama”

¹ Mwene Zambi, chilamwina chami, nakuteta kuli yena mwalwa ni ufuku.

² Banjika kama ku kulemba chami, wivwe kama muteto wami, ungukwase.

³ Lamba linji hilianguwana, ngunambe kufwa.

⁴ Hanangwalula hamwe ni waze anambe kufwa, tachi jami jeswe janguhwa.

⁵ Nguli ngwe waze haashiha, ngwe waze haafunda. Ngwe waze haavulama liakulu, waze kaahashile kwakwasa nawa.

⁶ Hiunangukongo mu fuka, mu wina usuku, mu wina wa milima kuhiana.

⁷ Hiunangutenukina kuhiana, hiunangulambe ni miavu ye.

⁸ Hiunatwala masepa jami kusuku ni yami, hiunangupwisa ngwe Chuma cha kuzelwokesa ku meso jo. Hingunasakaminya, mana a kuchina akuhi;

⁹ meso jami haajimbajimba mumu ha kulila. Mwene Zambi, nakuteta kuli yena tangwa ha tangwa, nakwolola moko kuli yena nikulemba.

¹⁰ Yikomokeso wakuyilingila afu, nyi? Ayo kaakuhinduka akuchichimieke, nyi?

¹¹ Afu mu mafuka kaakwambulula zango lie liahiana, nyi? Hanji umwenemwene we muma mwa kwonona, nyi?

¹² Yikomokeso ye maayimona muma mwa milima, nyi? Hanji ululi we mu chifuchi cha atu waze haanavulama, nyi?

¹³ Mwene Zambi, nakuteta kuli yena; chichamene cheswe nakulemba kuli yena.

¹⁴ Mwene Zambi, kuchi mba unangulitunu? Kuchi mba unanguswamina?

¹⁵ Chize ku wanuke wami nakumona lamba, matangwa akwo nambile kufwa; hijinanguhu ni lamba lie linji chichize.

¹⁶ Ufwatulo we unangulundumukina; mwongo we hiwangupwisa wamokomoko.

¹⁷ Ufwatulo we uli ngwe sanga lia meya, lize lia kungujingilika.

¹⁸ Hiunangutwala masepa jami abema kuhiana kusuku, milima hiyabwa sepa liami.