Miaso (Masamu) 86 - Mukanda Wa Zambi 1970

Kulemba: “Mwene Zambi ngukwase kama”

¹ Mwene Zambi, ngubanjike kama ungukumbulule, mumu ngunalele, Chishi tachi.

² Ngulamwine kama ku kufwa mumu ngunashachila hali yena; ngulamwine kama mumu nguli kavumbi ke, nakusa mbunge kuli yena.

³ Yena uli Zambi yami, kashika nguvwile kama keke; nakulemba kuli yena tangwa heswe.

⁴ Aa Mwene Zambi, nguwahise kama yami kavumbi ke, mumu nakulemba kuli yena.

⁵ Mwene Zambi, yena wakutulinga kanawa, wakutukonekena; zango lie kulishi kuhwa kuli waze akukuwayila.

⁶ Mwene Zambi banjika kama ku kulemba chami, wivwe kama kuteta chami ungukwase.

⁷ Ha matangwa a lamba nakukutambika, mumu wakukumbulula ku kulemba chami.

⁸ Aa Mwene Zambi, kukushi zambi mukwo ngwe yena, kukushi niumwe yoze wakulinga ngwe yena.

⁹ Mavungu eswe waze watangile, maakeza ni kukufukamina. Kumaakalemesa unene we.

¹⁰ Yena uli mukwa ndundo, kuwakulinga yikomokeso; yena wika uli Zambi.

¹¹ Mwene Zambi, ngulongese kama yize unazange ngulinge, mba mungukwononokena; ngulongese kama, ngukulingile ni mbunge yeswe.

¹² Aa Mwene Zambi, Zambi yami, mungukuchichimieka ni mbunge yeswe; mungwambujola unene we ndoo ku miaka yeswe.

¹³ Chamwenemwene wakunguzanga ni zango lize kulishi kuhwa, hiwangulamwina ku kufwa.

¹⁴ Aa Zambi, akwa kulengumuka kaanangukatukila; mbunga ya yingalwe e akufupa kungushiha, atu waze keeshi kukuzanga.

¹⁵ Alioze yena Mwene Zambi, uli Zambi ya keke ni zango; kuushi kutenuka nikawashi, alioze wakulweza atu utu, wakumanununa yeswe yize wakwamba.

¹⁶ Tewulukila kuli yami, unguvwile kama keke; ngutakamise, ngulamwine, mumu nakukulingila ngwe chize te akukulingila mama.

¹⁷ Mwene Zambi, ngulweze kama chilayi cha ubeme we, hanga waze akunguvutwokela evwe sonyi muze haamona chize hiwangulembejeka, ni chize hiwangukwasa.