Miaso (Masamu) 85 - Mukanda Wa Zambi 1970

Kulemba: “Zambi kwasa kama Aisraele mu lamba lio”

¹ Mwene Zambi, hiunevwila akwa chifuchi che keke, hiunachiza Aisraele mu undungo, hiunaapwisa ngwe chize abwile hatangu.

² Hiunakonekena atu je shili jo, hiunajimuna milonga yo yeswe.

³ Ufwatulo we hiunahu, kuushi kutenukina nawa atu je.

⁴ Zambi chilamwina chetu tupwise kama ngwe chize twabwile hatangu, litwamine kama kutuvwila kubiha.

⁵ Muututenukina ndoo ku miaka yeswe, nyi? Utenu we kuuchi kuhwa, nyi?

⁶ Kuuchi kutuhuzulula nawa, hanga yetu atu je tuwahilile ni yena, nyi?

⁷ Aa Mwene Zambi, tulweze kama zango lie lize kulishi kuhwa, utulamwine.

⁸ Ngunabanjika chize anambe Mwene Zambi; kanatulakenya uhwimino, yetu atu jenyi, nyi kutwendele mu majila jetu a uhepuke.

⁹ Chamwenemwene kanalulika alamwine waze akumulemesa; ha chino uhenya wenyi muubwa mu chifuchi chetu.

¹⁰ Akwa zango ni akwa kushishika maabwa mu chifuchi, umwenemwene ni uhwimino muyibwa mo nawa.

¹¹ Umwenemwene wa atu muuheta ndoo mwilu; ululi wa Zambi muuheta ndoo hashi.

¹² Mwene Zambi matuwahisa, mavu jetu maatwaha mbuto yinji.

¹³ Umwenemwene muutetekela kulutwe lia Mwene Zambi, ni kumululikila jila.