Miaso (Masamu) 84 - Mukanda Wa Zambi 1970

Usona wa kubwa mu zuwo lia Zambi

¹ Zambi, Mukwa Ndundo Jeswe, nakuzanga zuwo lie kuhiana!

² Nakuzanga chinji kutwama mu zuwo lia Zambi, nakwivwa usona unji wa kutwama mo. Ni mbunge yami yeswe nakwimbila yena, Zambi ya mwono, miaso ya uhaliso.

³ Chibwe ndalamusepe ni tupiasa kaakulitungila mazuwo, kaakufunga ana jo hehi ni yilumbilo ye, Mwene Zambi Mukwa Ndundo Jeswe, Mwanangana wami kanda Zambi yami.

⁴ Kawaha atu waze akutwama mu zuwo lie ni kukuchichimieka ni miaso matangwa eswe!

⁵ Kawaha atu waze wakutakamisa, Waze akwivwa usona wa kuya ni kukuwayila ha mulundu wa Zione.

⁶ Muze akubalika mu chikulo cha Baka, che chikulo kuchakwalumuka ha mashima ja meya, vula musazu kakuzalisa yitende yacho.

⁷ Muze akwenda mu jila kaakutakama kuhiana; mumu maamona Zambi ya mazambi ku mulundu wa Zione.

⁸ Mwene Zambi, Mukwa Ndundo Jeswe, banjika kama ku kulemba chami Aa Zambi ya Yakoba, ngwivwe kama!

⁹ Aa Zambi, wahisa kama mwanangana wetu yoze watongwele!

¹⁰ Tangwa limuwika mu zuwo lie chili kuwaha kuhiana kanunu ka matangwa kweka. Chibema kuhiana kumana hehi ni chikolo cha zuwo lia Zambi yami, alioze hi chibema ko kutwama mu mazuwo ja yingulungulu.

¹¹ Mwene Zambi kali tangwa lietu kanda lukebwe wetu; kakutuwahisa ni kutulemesa. Keshi kumina Chuma chibema nichimwe kuli akwa ululi.

¹² Zambi Mukwa Ndundo Jeswe, kaawaha atu waze akushachila hali yena!