Miaso (Masamu) 83 - Mukanda Wa Zambi 1970

Kulemba: “Zambi kumba kama akwa kole ja Aisraele”

¹ Zambi kanda uhola kama! Kanda ulihulika, kanda ulihumikiza twalemba!

² Tala! Akwa kole je kaakukukatukila, waze akukuvutwokela kaakulimika ni yena.

³ Kaakutwama atu je punga, kaakulitesa hamuwika hanga ashihe atu je waze wakufunga.

⁴ Kaanambe ngwo: “Tweyenu, tushihe Aisraele eswe, hanga jina lio litoke liakulu!”

⁵ Haalitesa, haakolesa Usendo alimike ni yena:

⁶ Aedome, ni Aishmaele, ni Amoabe, ni Ahagre

⁷ ni Agebale, ni Aamone, ni Aamaleke, ni Afilistia, ni Atiru.

⁸ Asuria no haalibalakenya no, masepa jo a tachi a ku vungu lia Lote.

⁹ Alinge ngwe chize walingile Amidiane, mianangana Sisera ni Jabine ku lwiji Kishone,

¹⁰ Waakumbile ku limbo lia Endore, mijimba yo yiibolela ko.

¹¹ Miata jo a tujita alinge ngwe chize walingile mianangana Orebe ni Zebe; akwa kuyula jo eswe alinge ngwe chize walingile Zeba ni Zalmuna;

¹² waze ambile ngwo: “Chifuchi cha Zambi muchibwa nichetu lume.”

¹³ Aa Zambi, amwange ngwe fufuta, ngwe yiswaswa yize yinahehuka ni fuji,

¹⁴ ngwe chize kahia kakulekwoka ha kwocha kuna, ngwe chize mulengi wa kahia wakwocha milundu.

¹⁵ Ahange ni chijimbi che, evwise woma ni fuji ye ya tachi.

¹⁶ Aa Mwene Zambi, evwise sonyi, mba hanga atayize kama ndundo je.

¹⁷ Akunune, evwise woma ndoo ku miaka yeswe, afwe kwo ni sonyi jahiana.

¹⁸ Anyingike ngwo, yena wika uli Mwene Zambi, uli mwanangana wa akwa hashi eswe.