Miaso (Masamu) 81 - Mukanda Wa Zambi 1970

Mwaso wa chiwanyino

¹ Imbilenu ni uwahililo Zambi yoze wakutuhakwila, mwimbilenu Zambi ya Yakoba miaso ya kuhalisa!

² Butulenu kwimba tungoma, imbenu tulialia anene ni akepe.

³ Humunenu yitavwi ya chiwanyino, muze kakweji machitetama ni muze habwa ha muchima.

⁴ Yino yili Shimbi mu Israele, chiyulo cha Zambi ya Yakoba.

⁵ Yachamba kuli Aisraele, muze alimikine ni akwa chifuchi cha Egiptu. Yingwivwa limwe liji lize Chanyingikine ngwo:

⁶ “Yami nanutulile yilemu; yami nanutulile yiteli ya tujolo (briki).

⁷ Muze nabwile mu lamba yinungutambika, yingunulamwina. Muze mu malelwa te naswama, yingunukumbulula. Yingunweseka kuze ku meya a Meriba.

⁸ Yenu atu jami banjikenu ku kukanyamisa chami; yenu Aisraele ngwivwenu kama.

⁹ Kanda nulingila mazambi eka, chibwe kwawayila, shina yami.

¹⁰ Yami nguli Mwene Zambi, Zambi yenu, yoze wanuchijile mu chifuchi cha Egiptu. Bakulenu makanwa jenu, mungunulisa.

¹¹ “Alioze atu jami kaangubanjikile ko, Aisraele koononokene ko kuli yami.

¹² Kashika nakalishile mbunge jo hanga alinge ngwe chize azangile.

¹³ Nyi te atu jami kaakungwivwa, ni kungwononokena kama,

¹⁴ kachi te nazeyesele akwa kole jo nikawashi, ni kwakumba eswe;

¹⁵ kachi te waze akunguvutwokela, maafukama ni woma ku meso jami, kachi te lamba lio kulichi kahwa ndoo ku miaka yeswe;

¹⁶ kachi nalishile yenu atu jami ni tiriku yiyema yahiana, kachi te nanukuchishile ni wuchi wa mu yambu.”