Miaso (Masamu) 80 - Mukanda Wa Zambi 1970

Kulemba: “Zambi apwise kama Aisraele ngwe chize abwile hatangu”

¹ Aa Kafunga ka Aisraele, twalemba tubanjike kama yetu mapanga je. Haze ha chitwamo che cha wanangana, helu lia akwa mwono a mwilu,

² Lisolole ku mavungu ja Efraime, ni Benjamine, ni Manase. Tulweze ndundo je; tweya kama utulamwine!

³ Aa Zambi, tupwise kama ngwe chize twabwile hatangu! Tuvwile kama keke, utulamwine.

⁴ Mwene Zambi, Mukwa Ndundo Jeswe, matangwa angahi asala ko waze muutenuka mumu ha kuwayila cha atu je?

⁵ Watwaha yakulia ya chinyengo, watunwisa musenge unene wa masoji.

⁶ Hiunatayiza akwa mavungu waze atujingilika ase jita aatambule chifuchi chetu, akwa kole jetu kaakutukekuna.

⁷ Aa Zambi, Mukwa Ndundo Jeswe, tupwise kama ngwe chize twabwile hatangu! Tuvwile kama keke, utulamwine.

⁸ Hiunachiza mutondo wa vinyu mu Egiptu, hiunahumu atu akwo mu chifuchi cho, hiunatumbu mo we mutondo uze.

⁹ Hiunalulika homa habema hanga utatuke; miji yawo hiyinayi kusuku, hiyinatande mu chifuchi cheswe.

¹⁰ Chizulie chawo hichinafuku milundu, mitango yawo hiyinafuku mitondo yinene sedru.

¹¹ Mitango yawo hiyinahete ndoo ku kalunga lwiji Mediterane, ni ndoo ku lwiji Ufrateze.

¹² Mumu yika hiunabuzula chipanga chawo? Haliabwila atu eswe waze maabalika ko maahasa kwiya mihuko ya vinyu;

¹³ yombo haanayiliate, ni tushitu akwo a mu yambu haanayili.

¹⁴ Zambi, Mukwa Ndundo Jeswe, tewuluka kama kuli yetu! Kuze kwilu watwama tutale kama, tweya ulamwine kama atu je!

¹⁵ Tweya ulamwine kama mutondo wa vinyu uze watumbile yena mwene, chibuta cha ndenda chize watatwishile.

¹⁶ Akwa kole jetu haawocha, haaubatula; atenukine, waashiheshihe.

¹⁷ Funga kanawa atu je waze watongwele, vungu lize watakamishine.

¹⁸ Kutuchi kukwehuka nawa nihakepe, tufunge kama tubwe ni mwono mba hanga tukuchichimieke.

¹⁹ Mwene Zambi, Zambi Mukwa Ndundo Jeswe, tupwise kama ngwe chize twabwile hatangu! Tuvwile kama keke, utulamwine.