Miaso (Masamu) 79 - Mukanda Wa Zambi 1970

Kulemba: “Zambi atusule kama Aisraele”

¹ Aa Zambi, akwa mavungu haanjila mu chifuchi che. Haajilula zuwo lie lia chijila; Yerusaleme hamupwisa yikulu.

² Mijimba ya atu je haayipwisa yakulia ya tujila, mijimba ya tuvumbi twe haanayili kuli tushitu.

³ Haamwanga manyinga ja atu je, e manyinga kaanapukumuka ngwe meya mu Yerusaleme mweswe, wakuhi niumwe yoze mahasa kufunda atu waze.

⁴ Mavungu waze anatujingilika, kaakutukekuna, kaakutuyenga.

⁵ Mwene Zambi, miaka yingahi muutuvwila ufwatulo? Ndoo ku miaka yeswe, nyi? Ufwatulo we muunyongonona ni kulekwoka ngwe kahia, nyi?

⁶ Tenukina kama mavungu waze kaakunyingikine, waze keeshi kukuwayila.

⁷ Mumu haashiha atu je, heenyeka chifuchi che.

⁸ Kanda utumwesa lamba mumu ha shili ya tushakulu twetu, alioze haliabwila tuvwile kama keke, mumu lamba hiliatuhiana.

⁹ Aa Zambi, tukwase kama, tulamwine, tukonekene kama milonga yetu mumu ha jina lie.

¹⁰ Mumu yika mavungu maamba ngwo: “Zambi yenu yolihi?” Mwesa kama mavungu lamba mumu haamwanga manyinga ja tuvumbi twe!

¹¹ Banjika chize anatete waze ali mu zuwo lia lamba! ku ndundo je tusula kama waze anambe kushiha kuli akwa kole jo.

¹² Mwene Zambi eswe waze te akukushililika, ahilwishile kama lamba yisuho shimbiali.

¹³ Mba yetu atu je, yetu mapanga je, mutukusakwilila ni kukuchichimieka ndoo ku miaka yeswe.