Miaso (Masamu) 78 - Mukanda Wa Zambi 1970

Zambi ni atu jenyi

¹ Atu jami, banjikenu ku maliji jami, ngwivwenu.

² Munguhanjika ni yishima, ni kunwambulwila yijimbikilo ya tushakulu,

³ yuma yize hitunevu ni yize hitunanyingika yize atulwezele tushakulu twetu.

⁴ Kutwahashile kuyiswekela ana jetu. Mutukayambulula ku Chisemuko cha kulutwe, ndundo ja Mwene Zambi ni yitanga yenyi, ni yuma ya kukomwesa yize hanalingi.

⁵ Hanahana Shimbi kuli Aisraele, yiyulo kuli vungu lia Yakoba. Yalongesa tushakulu twetu alongese Shimbi jenyi kuli ana jo,

⁶ hanga Chisemuko cha kulutwe no akalilongese jo, no nawa akajilongese ana jo,

⁷ hanga no nawa akashachile hali Zambi, nyi ka, maavulama yize Zambi hanalingi. Alioze akafunge Shimbi jenyi matangwa eswe.

⁸ Keechi kabwa ngwe chize abwile tushakulu two, akwa pami ni yihulia, waze kaashachilile ko kanawa hali Zambi, ni kaajikijilile ko hali iye.

⁹ Aefraime, chibwe te kaali ni mata jo a manana, hindu yaachina ha matangwa ja jita.

¹⁰ Kafungile ko Usendo uze akolesele ni Zambi, yaakolema Shimbi jenyi.

¹¹ Yaavulama kwo yuma yize Zambi aalingilile, ni yitanga yenyi ya kukomwesa.

¹² Zambi yalinga yilayi ku meso ja akako, mu puya ya Zoane mu chifuchi cha Egiptu.

¹³ Yahandununa meya a kalunga lwiji, yaazawisa, yalumbika meya ngwe chipanga.

¹⁴ Ha mwalwa yaasongwela ni lelwa, ha ufuku ni kahia.

¹⁵ Yabula mawe mu puya yaaha meya a kunwa a kushi lia hashi.

¹⁶ Yatuhwisa meya mu liwe, e meya yalumuka lwiji.

¹⁷ Hindu yaavulumiona Zambi, yaalimika ni Zambi Mukwa Ndundo Jeswe mu puya.

¹⁸ Yeeseka Zambi ha kumwita yakulia yize azangile.

¹⁹ Yaamusaula ngwo: “Kuma Zambi mahasa kutulisa muno mu puya, nyi?

²⁰ Chamwenemwene hanabulu liwe, mba meya yaapukumuka; alioze, mahasa kutwaha nawa mbolo ni yifwo, nyi?”

²¹ Kashika Zambi weevwilile ufwatulo unji, yoonona ni kahia,

²² mumu kaamusele ko mbunge, chibwe kaafulielele ko ngwo, mahasa kwalamwina.

²³ Hindu Mwene Zambi yambila lilu ngwenyi: “Yena lilu azulula yajilo ye!”

²⁴ Yaaha mbolo ya mwilu, yaatumina mana hanga alie.

²⁵ Yaalialia yakulia ya tunganda twa mwilu. Zambi yaaha yakulia yinji ndoo yaakuta.

²⁶ Mba yaatuma fuji ya ku chivumbuko, ku ndundo jenyi yaatumina fuji ya ku sude.

²⁷ Yaatumina nawa tujila anji ngwe masekeseke a ku mbumbulu ya kalunga lwiji.

²⁸ Yaaholokela mukachi ka musumba, yaajingilika mazuwo jo.

²⁹ Atu yaaha, yaakuta; Zambi yaaha yeswe yize azangile.

³⁰ Alioze muze te maachilia, kanda achikuta,

³¹ Zambi yeevwila wuli, yaashiha e akwa tachi, ana malunga abema kuhiana a mu Israele!

³² Chibwe chocho atu yaavulumiona, kaashachilile ko hali Zambi.

³³ Kashika Zambi wakehesele matangwa jo, yaakuwisa susumuku.

³⁴ Alioze muze te akushiha amwe a kuli ayo, waze asalile ho te kaakutewulukila kuli iye, ni kwalumuka ku mbunge ni kumuwayila.

³⁵ Mba yeewuluka ngwo, Zambi kali hwe lio; Mukwa Ndundo Jeswe kali chikwashi cho.

³⁶ Alioze maliji jo yaabwa a mahuza, maliji jo te aulembekese.

³⁷ Mbunge jo kujalulamine ko kuli iye, kaafungile ko Usendo uze akolesele no.

³⁸ Alioze Zambi yevwila atu jenyi keke. Yaakonekena shili yo, koonwene ko. Yalihumikiza no yisuho yinji, keevwilile ko ufwatulo.

³⁹ Yewuluka ngwenyi, kuma kaali lume akwa hashi, kaali ngwe fuji yize yinahehuka sali ni sali.

⁴⁰ Yaalimika ni Zambi yisuho yinji mu puya, ni kumuvwisa chinyengo.

⁴¹ Yaamweseka yisuho yinji, ni kuvwisa Zambi Munangi wa Aisraele chinyengo.

⁴² Keewulukile ko ndundo jenyi, chibwe tangwa lize Zambi aalamwinyine kuli akwa kole jo.

⁴³ Kewulukile ko yilayi ni yikomokeso yize alingile, mu chana cha Zoane mu chifuchi cha Egiptu.

⁴⁴ Ngiji jo ni yitwetwe yo yayalumuna manyinga, hanga akwa Egiptu keechi kuhasa kunwina mo nawa meya.

⁴⁵ Yaatumina jiji waze aamwesene lamba, ni yula ya mbwota waze abihishile chifuchi cho.

⁴⁶ Yatuma yiminguna hanga alie mbuto jo, ni makumbi hanga enyeke minda yo.

⁴⁷ Yamakwona yinjinda yo ya vinyu ni vula ya chiwe, yenyeka mikuyu yo ni chishika.

⁴⁸ Yashiha ngombe jo ni vula wa chiwe, ni mapanga jo ni njaji.

⁴⁹ Yaatenukina kuhiana, yaamwesa lamba, yaatumina tunganda waze akushiha atu.

⁵⁰ Utenu wenyi kuwahwile ko, keechele ko ni mwono, yaashiha ni misongo yibi.

⁵¹ Yashiha ana atangu eswe a malunga, a mu majiko ja akwa Egiptu.

⁵² Mba yatuhwisa atu jenyi ngwe mapanga, yaasongwela ndusu mu puya.

⁵³ Yeendesa kanawa kanawa, keevwile ko woma, alioze kalunga lwiji yafuka akwa kole jo.

⁵⁴ Yaatwala ku chifuchi chenyi cha chijila, ku milundu yize akumbile iye mwene.

⁵⁵ Yahuma akwa kole kulutwe lia atu jenyi yatetela e mavungu ja Aisraele che chifuchi, mba yahana mazuwo jo kuli atu jenyi.

⁵⁶ Hindu yaakatukila mwe Zambi, Mukwa Ndundo Jeswe, yaamweseka. Kaafungile ko Shimbi jenyi.

⁵⁷ Yaamukatukila, yaabwa yihulia ngwe tushakulu two, yaabwa ngwe mwivu wa piya.

⁵⁸ Yaamuvwisa ufwatulo ni yilumbilo yo ya mazambi eka, yaamuvwisa ukwa ni tuponya two.

⁵⁹ Zambi, muze hachimona yatenuka, mba yeehuka liakulu.

⁶⁰ Yehuka zuwo lienyi lia makubu kuze ku Shilo, mu zuwo lize te akutwama mukachi ka Aisraele.

⁶¹ Yatayiza akwa kole kutambula mushete wa Usendo, chizulie cha uhenya wenyi ni ndundo jenyi.

⁶² Yatenukina atu jenyi, yatayiza akwa kole kwashiha.

⁶³ Ana jo a malunga yaafwafwa mu jita; ana jo a mapwo yaahona malunga.

⁶⁴ Mahako jo a Zambi yaashiha ni mikwale, kaatayijile ko tuliwa jo kulila.

⁶⁵ Hohene Mwene Zambi yakasumuka ngwe mutu yoze unahinduka mu tulo, ngwe chitakame yoze unakalumioka muze hanwa walwa.

⁶⁶ Yahuma akwa kole jenyi, yaamwesa sonyi jinji.

⁶⁷ Alioze yalituna vungu lia Josefe, katongwele ko vungu lia Efraime.

⁶⁸ Alioze yatongola vungu lia Yuda, ni mulundu wa Zione uze akuzanga chinji.

⁶⁹ Henaho atungile zuwo lienyi ngwe lia mwilu, yalikolesa mbee ngwe mavu, mulilinduluka ndoo ku miaka yeswe.

^70-71 Zambi yatongola kavumbi kenyi David, yamuchiza ku milimo ya kufunga mapanga. Yamupwisa mwanangana hanga afunge atu jenyi, Aisraele.

⁷² David yaafunga ni mbunge ya kutuwika, yaayula kanawa.