Miaso (Masamu) 77 - Mukanda Wa Zambi 1970

Kulembejeka ha matangwa a lamba

¹ Ngunatete chikolo kuli Zambi, ngunatete kuhiana, neye kanangwivu.

² Ha matangwa a lamba nakulemba kuli Mwene Zambi, ufuku weswe nakwolola moko jami ni kulemba, hindu lamba kulisolo kuhwa.

³ Muze ngunewuluka Zambi, nakutwa mikuma, muze ngunashinginyeka mbunge yami yinalezumuka.

⁴ Zambi kazangile nguye tulo, ngunalibikala kuhiana, chahashile kuhanjika.

⁵ Ngunanyongo ha matangwa waze haabalika, ngunewuluka miaka ya ku shakulu.

⁶ Ufuku weswe nakunyonga chinji, nakulishimwinya nikulihula ngwami:

⁷ “Kuma Zambi matulituna yetu matangwa eswe, nyi? Kechi kuwahilila nawa ni yetu nichimwe, nyi?

⁸ Kuma keshi kutuzanga nawa, nyi? Chilakenyo chenyi chili chamokomoko, nyi?

⁹ Kuma Zambi keshi ni keke nawa, nyi? Kali ni utenu wika hi zango nawa ko, nyi?”

¹⁰ Mba yingwamba ngwami: “Yize yakungwaha chinyengo kuhiana yili yino: Zambi keshi nawa ni ndundo ngwe hatangu, nyi?”

¹¹ Mwene Zambi, mungwiwuluka yitanga ye yinene, mungwiwuluka yikomokeso ye ya ku shakulu.

¹² Mungunyonga ha yuma yeswe yize walingile, mungubukuna ha yitanga ye yeswe yinene.

¹³ Aa Zambi, yuma yeswe yize hiunalingi yili ya chijila! kukushi umwe zambi munene ngwe yena!

¹⁴ Yena uli Zambi yoze wakuneha yikomokeso, yiusolola tachi je hakachi ka mavungu.

¹⁵ Ku ndundo je yiulamwina atu je, vungu lia Yakoba ni Josefe.

¹⁶ Aa Zambi, muze meya akumwene, yeevwa woma, majinga nawa yaachikima, chibwe meya waze atwama mu mashima yaachikima.

¹⁷ Malelwa yaala, vula yanoka, yiikulunguza ni lundunjila, kweswe yikubwa mihenyo.

¹⁸ Che kukulunguza yichimwangana kweswe, mihenyo yiihenya kweswe, hashi yihanyika, yihachikima.

¹⁹ Te wakwendangana mu meya, yiumwanga kalunga lwiji, alioze ngano je kujasolokele ko.

²⁰ Te wakusongwela atu je ngwe chize kafunga akusongwela mapanga jenyi, Mose ni Arone te kaakwayula.