Miaso (Masamu) 76 - Mukanda Wa Zambi 1970

Zambi mwe mukwa kukumba

¹ Ayuda kaanyingika Zambi, Aisraele kaakulemesa jina lienyi.

² Katwama mu limbo lia Yerusaleme, ha mulundu wa Zione.

³ Kwenako amakwinyine mivwi ya akwa kole, ni kebwe ni mukwale ni yitwa yeswe ya jita.

⁴ Aa Zambi, uli mukwa uhenya kuhiana! Ulamba, we wakusoloka muze wakukatwoka ku milundu, kuze wakumbilile akwa kole je.

⁵ Tujita two a tachi yaabuba yuma yeswe, haliabwila kaakubomba tulo twa kufwa, tachi ni mana jo yeswe kuyaakwashile.

⁶ Muze yena Zambi ya Yakoba wejile ni kwaamba, tuvwalu two ni waze endele ho yaafwa susumuku.

⁷ Alioze yena Zambi, wakuvwisa atu eswe woma! Iya mahasa kumana ku meso je muze unatenuka?

⁸ Kuze kwilu, hiunalweze atu chize wakubatula milonga; akwa hashi yeevwa woma, yaahola kuluu,

⁹ muze wakatukile ni kubatwila atu, ni kulamwina eswe waze akumwesa lamba kuli akwa kole jo.

¹⁰ Chibwe wuli wa atu akukuchichimieka, atu waze maasala ni mwono muze jita hiyabalika, maafunga yiwanyino.

¹¹ Mwehenu Mwene Zambi, Zambi yenu, yuma yize nwamulakenyene, mavungu waze nuli hakamwihi munehenenu milambu yenu, Zambi kakuvwisa atu woma;

¹² kakulelesa yilolo waze akulengumuka, kakuvwisa mianangana mwongo.