Miaso (Masamu) 73 - Mukanda Wa Zambi 1970

Mukanda Wa Muchitatu ( Mia 73—89 ) Ululi wa Zambi

¹ Chamwenemwene Zambi kakuwahisa Aisraele, waze akwete mbunge jibema!

² Yami te kwasala hakehe nguhukane, te kwasala hakehe ngutalinge,

³ mumu nevwilile yingulungulu ukwa unji muze namwene yiwape yo.

⁴ Keeshi kumona lamba; kaali akwa tachi, mijimba yo yibema.

⁵ Keeshi kumona lamba ngwe atu akwo; keeshi kulibikala ngwe akwo.

⁶ Kashika akuzala kulengumuka mu kota ngwe kaliki, kaakuzala upupilo ngwe mahina.

⁷ Mu mbunge jo mwakutuhuka yibi, kaakunyonga yuma yibi,

⁸ Kaakukekuna ato akwo, kaakuhanjika yuma yibi; kaakulizata, kaakunyonga kumwesa atu akwo lamba.

⁹ Kaakusaula Zambi wa mwilu; kaakuhana Shimbi yikalu kuli atu hano hashi.

¹⁰ Kashika chibwe atu ja Zambi kaakutewulukila kuli ayo nikufuliela nikawashi yuma yize akwamba.

¹¹ Kaakwamba ngwo: “Zambi kechi kunyingika; Zambi Mukwa Mwilu Wahiana kechi kuchinyingika nihakepe!”

¹² Chenacho abwa yingulungulu. Kaali ni yuma yinji, hindu kaakuliwezela yuma yikwo yahiana.

¹³ Kuma chili chamokomoko hinafunga mbunge yami, muze chalingile yibi, nyi?

¹⁴ Aa Zambi, tangwa heswe wakungubinjisa; chichamene cheswe wakungumwesa lamba.

¹⁵ Nyi nahanjikile yuma ngwe yize, kachi te hi nguli ko umwe wa kuli atu je.

¹⁶ Nesekele kunyonga ngunyingike yuma yino, alioze yize yeswe yiingubwila yikalu,

¹⁷ ndoo ni muze nanjilile mu zuwo lia yena Zambi. Mba yingunyingika yize muyikabwa hali yingulungulu.

¹⁸ Chamwenemwene muukaasa ha yihela yasenena, muukaanyasa ukoonone!

¹⁹ Kaakufwa susumuku, kaakunonga chibi.

²⁰ Kaali ngwe yilota ya tulo, chichamene, nyi wahinduka, kuyichi kubwa ko.

²¹ Muze nevwile kusasaminya mu mbunge yami, muze nevwile chinyengo,

²² nabwile chihepuke, ngwe nguli kashitu, te Chishi kunyingika manyonga je.

²³ Alioze nguli hamwe ni yena matangwa eswe, wakukwata kwoko liami lia chindume.

²⁴ Wakungusongwela ni longeso lie, mba kulutwe muukangutambula ni vumbi.

²⁵ Iya mukwo nguli nenyi muze mwilu, shina yena wika? Chika nawa mungufupa hano hashi, shina yena wika?

²⁶ Chibwe mbunge yami ni mujimba muyihonga, Zambi kali tachi jami, shina iye wika ku miaka yeswe.

²⁷ Chamwenemwene, waze akulituna yena kumaakafwa, eswe waze akukwehuka muukoonona.

²⁸ Alioze yami ngunawahilila kuhiana muze nguli hehi ni Zambi, muze Mwene Zambi akungufunga, ni muze nakwambujola yeswe yize hanalingi.