Miaso (Masamu) 72 - Mukanda Wa Zambi 1970

Kulemba mumu hali mwanangana

¹ Aa Zambi, longesa kama mwanangana kubatwila ni ululi ngwe yena; mulweze chize yena wakubatwila atu,

² hanga ayule atu je ni ululi, ni akwa lamba ni mbunge yibema.

³ Che chifuchi chibwe ni uhwimino ni ululi ha milundu ni ha mindundena.

⁴ Mwanangana abatwile yiswale ni ululi; akwase akwa kuhona, akumbe akwa kumwesa akwo lamba.

⁵ Atu je akuwayile ndoo ni muze tangwa ni kakweji kuyichi kusoloka nawa, ndoo ku miaka yeswe.

⁶ Mwanangana abwe ngwe vula mu minda ni hashi heswe,

⁷ Atu abwe akwa ululi ha matangwa eswe a mwono wenyi, atu abwe ni yuma ya kulumbama ndoo ni muze kakweji kechi kasoloka nawa.

⁸ Wanangana wenyi muukatanda chize ku kalunga lwiji ndoo ku kalunga lwiji mukwo, chize ku lwiji Ufrateze ndoo ku songo lia hashi.

⁹ Atu waze akutwama mu puya maakamuwayila, akwa kole jenyi maakalifukwila mavu.

¹⁰ Mianangana ja chifuchi cha Espania, ni a mahongo maamwaha yawana; Mianangana ja chifuchi cha Arabia ni Etiopia maamulambula milambu.

¹¹ Mianangana eswe maakamuwayila; mavungu eswe maakamulingila.

¹² Kakupulula akwa kuhona muze maateta kuli iye, ni yiswale waze keeshi yikwashi.

¹³ Yiswale ni waze keeshi tachi, kaakwevwila keke, kakulamwina akwa kuhona.

¹⁴ Kakwapulula kuli akwa kwahungumiona ni akwa kwashiha, kakulemesa mwono wo.

¹⁵ Mwanangana alinduluke mu wanangana wenyi. Atambule oru ya ku Arabia; atu amulembele Zambi matangwa eswe; Zambi amuwahise matangwa eswe!

¹⁶ Mbuto yinji yibwe ha milundu ni mu chifuchi cheswe ngwe ha milundu ya Libano. Membo azale ni atu, ngwe yambu ya mu chana.

¹⁷ Jina lienyi atu kanda alivulama, lufuma wenyi alinduluke ngwe chize liakulinduluka tangwa. Mavungu eswe amuchichimieke, ahule Zambi aawahisa; atu no awahise mwe mwanangana.

¹⁸ Halisenu Mwene Zambi, Zambi ya Aisraele, iye wika wakulinga yuma ya kukomwesa!

¹⁹ Chichimiekenu jina lienyi lilemu ndoo ku miaka yeswe, uhenya wenyi ukabwe hashi heswe! Chibwe kama Chenacho! Chibwe kama Chenacho!

²⁰ Miaso ya David, mwana wa Yese, henaha yinasulila.