Miaso (Masamu) 71 - Mukanda Wa Zambi 1970

Kulemba cha kashinakaji

¹ Mwene Zambi, hineza kuli yena hanga ungufunge, kanda unguvwisa kama sonyi nilimwe tangwa!

² Ngukwase kama, ngulamwine, mumu yena uli mukwa ululi. Ngwivwe kama ungupulule!

³ Bwako luliwe lwami lwa kuswama mo, ni zuwo liami liakukoleka. Yena uli uchinyino wami ni chiswamo chami.

⁴ Zambi yami, ngupulule kama ku moko ja yingulungulu, ku moko ja yihenge, kanda yiswii.

⁵ Mwene Zambi, nakusa mbunge yami kuli yena; chize ku ukweze wami nakujikijila hali yena.

⁶ Matangwa eswe te nakushachila hali yena; yena wakungukwachilila chize ku kusemuka chami. Mungukuhalisa matangwa eswe!

⁷ Mwono wami uli chilweza kuli atu anji, mumu yena uli chiswamo chami cha tachi.

⁸ Tangwa heswe nakukuhalisa, nikwambujola uhenya we.

⁹ Kanda ungulituna muze hinabwa kashinakaji, kanda ungwehuka mumu hinazeya.

¹⁰ Akwa kole jami kaakufupa kungushiha, kaakungwambamba, kaakungutwama punga.

¹¹ Ngwo: “Zambi hanwehuka; tumukaulenu, tumukwate; mumu kukushi yoze mamulamwina.”

¹² Aa Zambi, kanda ubwa kusuku ni yami; Zambi yami, tambuka kama ungukwase!

¹³ Atu waze akungukatukila, akumbe kama, afwe kwo! Waze akuzanga kungulinga yibi, evwe sonyi kuhiana!

¹⁴ Mungusa mbunge kuli yena matangwa eswe, mungukuhalisa nawa ni nawa.

¹⁵ Mungwambujola ubeme we; tangwa lieswe munguhanjika hakutwala ku ulamwino we, chibwe chahashile kunyingika yeswe.

¹⁶ Mwene Zambi, mungufumanyisa ndundo je jahiana, mungwambujola ubeme we, ubeme we wika.

¹⁷ Chize ku wanuke wami wakungulongesa, ndoo ni musono nakulweza atu yuma ya kukomwesa yize wakulinga.

¹⁸ Aa Zambi, muze hinabwa kashinakaji, kambu jami hijatoma, kanda ungwehuka! Bwako hamwe ni yami muze ngunafumanyisa ndundo je, ku yisemuko yeswe yize muyiza kulutwe.

¹⁹ Aa Zambi, ululi we wakuheta ndoo kwilu, hiunalingi yuma yinene, kukushi mukwo ngwe yena!

²⁰ Wangutuminyine lamba ni luyinda, alioze muuhilwisa tachi jami, muungufunga ku kufwa.

²¹ Yena muungupwisa nawa mutu munene, muungulembejeka nawa.

²² Zambi yami, chamwenemwene mungukuhalisa ni kalialia. Zambi yami, munguchichimieka umwenemwene we. Yena Munangi wa Israele, mungukwimbila ni kalialia.

²³ Mungukololoka ni uwahililo muze mungukwimbila; mungukwimbila ni mbunge yami yeswe mumu hiunangulamwina.

²⁴ Mungulweza atu ululi we tangwa lieswe, mumu atu waze afupile kungulinga yibi haakunuka, heevwa sonyi.