Miaso (Masamu) 7 - Mukanda Wa Zambi 1970

Kulemba: “Mwene Zambi ngubatwile kama ni ululi”

¹ Aa Mwene Zambi, Zambi yami, hinaswama muli yena; ngulamwine, ngupulule kama kuli eswe waze ananguhange.

² Nyi ka, maangupapulula ngwe tambwe, Maangutwala kusuku kuze niumwe mahasa kungupulula.

^3-4 Aa Mwene Zambi, Zambi yami, nyi hinalinga chibi kuli umwe, nyi hinakunjika sepa liami kuli akwa kole jenyi, hanji nyi hinalweza keke umwe yoze hanangulingi chibi,

⁵ kuheshi chuma, akwa kole jami anguhange, angukwate, angulimbwile hashi, angushihe, anguhichike wamufu hashi!

⁶ Aa Mwene Zambi, katuka kama ni utenu we! Limike ni akwa kole jami waze anevu wuli. Katuka ungukwase kama, mumu yena wakuhana Shimbi ja ululi.

⁷ Kungulula atu eswe hamuwika, yena mwilu waayule.

⁸ Mwene Zambi, yena wakubatwila atu eswe, Aa Mwene Zambi, ngubatwile kama nikulita ni ululi wami, chishi kwami chitela.

⁹ Yena uli Zambi ya ululi, wakutubatwila nikulita ni manyonga jetu ni kuzanga chetu. Kanjisa yingulungulu, kanda avulumuna nawa, Kundulula akwa ululi.

¹⁰ Zambi kali lukebwe wami, kakulamwina waze akumwononokena.

¹¹ Zambi kali ngaji wa ululi, kakutenukina yingulungulu tangwa ha tangwa.

¹² Nyi kaalumwine ndako jo, Zambi mahela mukwale wenyi, manana uta wenyi, makalula mivwi yenyi.

¹³ Kanande mata a kushiha no atu, Kanase mivwi yenyi ya kahia.

¹⁴ Chingulungulu kakuseseka yibi, kakubinda ni uhenge, kakusema mahuza.

¹⁵ Kakufula umbu lisuku, alioze kakulimbukila mo iye mwene.

¹⁶ Uhuka wenyi muukamuhilukila iye mwene; yibi yenyi muyikamuholokela ha mbanda mutwe.

¹⁷ Ngunasakwilila Mwene Zambi mumu ha ululi wenyi. Ngunembila Mwene Zambi, Mukwa Mwilu Wahiana, uhaliso.