Miaso (Masamu) 68 - Mukanda Wa Zambi 1970

Aisraele yeemba mwaso wa kukumba

¹ Zambi kanakatuka ni kumwanga akwa kole jenyi! Atu waze akumuvutwokela kaanachina ku meso jenyi.

² Zambi kanaahange, ngwe chize fuji yakutakumuna mwishi; kumaatoka ku meso ja Zambi, ngwe chize Sela yakusangunuka ni kahia.

³ Alioze akwa ululi kaanwahilila ni kulikwiza ku meso jenyi; kaanawahilila ni kukololoka ni chiseke.

⁴ Mwimbilenu Zambi, mwimbilenu ni kuchichimieka jina lienyi; lulikenu jila ya yoze unende ha malelwa. Jina lienyi Mwene Zambi, wahililenu ku meso jenyi!

⁵ Zambi yoze watwama mu zuwo lienyi lia chijila; kakutala ana a shiwa, kakufunga mapwo waze haanafwisa malunga.

⁶ Atu waze atwama ukawo, Zambi kakwaha majiko; kakujitula funge hanga abwe ni kuwaha cha utuswilo. Alioze akwa kulimika chaatamba kutwama mu chifuchi chumu.

⁷ Aa Zambi, muze te wakusongwela atu je, muze te wakwenda mu puya,

⁸ chifuchi yichinyika, vula yanoka hashi, mumu yena Zambi ya mulundu wa Sinai, Zambi ya Aisraele, te uneza.

⁹ Wanokesene vula munji, mba mavu abi yaabema.

¹⁰ Atu je yaatunga ho mazuwo jo; ku zango lie liahiana yiukwasa yiswale.

¹¹ Mwene Zambi yahana Shimbi, mba mapwo anji yaamwanga sango ngwo:

¹² “Mianangana ni tujita two kaanachina!” Mapwo waze asalile mu yihunda yaalipangila yuma yize abubile mu jita:

¹³ yizulie ya membe yize alamikine prata, mapulwa jo ngwe oru yibema. (Mumu yika atu jenu asalilile ku matanga ja mapanga ha tangwa lia jita?)

¹⁴ Muze Zambi, Mukwa Ndundo Jeswe, hamwanga mianangana ha mulundu wa Zalmone, yanokesa neve (neige) hazehene ha mulundu.

¹⁵ Mulundu wa Bashane uli unene kuhiana! uli ni mitwe yinji!

¹⁶ Yena mulundu usuku, mumu yika wakulemesa mulundu uze atongwele Zambi? Mwene Zambi matwama ho ndoo ku miaka yeswe!

¹⁷ Mwene Zambi hakatuka ha mulundu wa Sinai, heza ndoo muma mwa chijila mu matemba jenyi tununu ni tununu.

¹⁸ Muze azezukile mwilu yatwala funge hamwe nenyi, yatambula yawana kuli atu, chibwe kuli yingulungulu, Mwene Zambi makatwama ko ndoo ku miaka yeswe.

¹⁹ Halisenu Zambi, iye mwene wakumbata yiteli yetu tangwa ha tangwa, Kakutulamwina.

²⁰ Zambi yetu kali Zambi yoze wakutulamwina; kali Mwene Zambi, Mwene wetu, yoze wakutulamwina ku kufwa.

²¹ Chamwenemwene Zambi makalokola mitwe ya akwa kole jenyi, ni waze akukaula jila jo ene.

²² Mwene Zambi yamba ngwenyi: “Mungukahilwisa akwa kole jenu waze atwama mu chifuchi cha Bashane, waze atwama ku mashima ja meya.

²³ Ha chino munukendangana mu manyinga jo, tuwa twenu maakaalia ngwe chize anazange.”

²⁴ Aa Zambi, atu eswe kaanamono chize yena mukwa kukumba unende ha mukana we, chize unanjila ha mukana mu zuwo lie lia chijila, yena mwanangana wami.

²⁵ Njimba kaali kulutwe, akwa yisaji kaali kunyima, ana mapwo kaali mukachi nikwimba tungoma.

²⁶ “Chichimiekenu Zambi mu Chikungulwila cha atu jenyi, halisenu Mwene Zambi yenu vungu lia Yakoba eswe!”

²⁷ Hatangu vungu lia Benjamine, vungu likepe kuhiana, mba miata ja Yuda ni mbunga yo, hakusula miata ja mavungu ja Zabulone ni Naftali.

²⁸ Aa Zambi, solola ndundo je, ndundo jize watukwashile najo.

²⁹ Muze mu zuwo lie mu limbo lia Yerusaleme, kuze mianangana a hashi akwiza ni kukulambula milambu,

³⁰ Bajila Egiptu, kashitu wa mukachi ka mbungu; bajila nawa mavungu akwo, makuji a ngombe ni ana jo, ndoo ni muze meeza ni kufukama ku meso je, ni kukulambula prata jo. Mwanga atu waze akuzanga kwasa jita!

³¹ Milopo maakatuka ku chifuchi cha Egiptu, akwa Sudane maakazundula moko jo ni kulemba kuli Zambi.

³² Akwa yifuchi eswe a hashi mwimbilenu Zambi miaso, mwimbilenu Mwene Zambi miaso ya kuhalisa,

³³ Yoze wakwendangana kwilu, lilu lia miaka yeswe! Banjikenu chize anakulunguza!

³⁴ Ambululenu ndundo ja Zambi; uhenya wenyi uli hali Aisraele, ndundo jenyi jakumoneka kwilu.

³⁵ Zambi kakulisolola kole ni woma kuze ku zuwo lienyi lia chijila. Mwene Zambi ya Israele kakuhana tachi ni ngolo kuli atu jenyi. Fumanyisenu Zambi!