Miaso (Masamu) 66 - Mukanda Wa Zambi 1970

Kuchichimieka ni kusakwilila

¹ Atu eswe fumanyisenu Zambi ni kukololoka ni uwahililo.

² Fumanyisenu jina lienyi ni miaso, mufumanyisenu kuhiana!

³ Lwezenu Zambi ngwenu: “Wakulinga yuma ya kukomwesa kuhiana! Uli ni ndundo jinji! Kashika akwa kole je akuhetama ku meso je ni woma.

⁴ Akwa hashi eswe kaakukuwayila, kaakufumanyisa jina lie.”

⁵ Tweyenu numone yuma yize alingile Zambi, hanalingi yuma ya kukomwesa mukachi ka atu.

⁶ Yomisa meya, mba tushakulu twetu yaazauka hashi homu. Kwenako twawahililile mumu ha yize alingile.

⁷ Kakuyula ni ndundo jenyi ndoo ku miaka yeswe, kakutala meso jenyi hali mavungu. Akwa kukolema kanda ahamika nenyi.

⁸ Mavungu eswe, fumanyisenu Zambi yetu, liji lia kumuhalisa lihiohie.

⁹ Iye hatufunga ni mwono, katayijile ko yetu kukokoloka.

¹⁰ Zambi hiwatweseka ngwe chize atu akweseka prata ha kahia.

¹¹ Hiwatayiza tufwe mu miheto, hiwatusa yilemu yinji ha yipaya.

¹² Hiunatayiza akwa kole kutuliataliata, hitunanjila mu kahia ni mu sanga lia meya. Alioze haliabwila hiwatuchiza mo, ni kutuneha muma mwa uhwimino.

¹³ Munguneha milambu ya kwocha mu zuwo lie, mungukwaha yize nalakenyene.

¹⁴ Mungukwaha milambu yeswe yize nalakenyene, muze nabwile mu lamba.

¹⁵ Mungulambula mapanga akwocha ha chilumbilo, munguneha makuji a ngombe ni pembe; mwishi muukanduka ndoo kwilu,

¹⁶ Yenu eswe waze nwakuvwila Zambi woma, tweyenu nwivwe, ngunulweze yize alingile hali yami.

¹⁷ Natetele kuli iye angukwase, namuchichimiekene ni miaso.

¹⁸ Nyi te hinasweka shili yami mu mbunge, kachi Mwene Zambi kangubanjikile ko.

¹⁹ Alioze Zambi yangubanjika, yevwa kuliumba chami.

²⁰ Ngunafumanyisa Zambi, mumu kalitunyine kulemba chami, kanguminyine zango lienyi lize kulishi kuhwa.