Miaso (Masamu) 65 - Mukanda Wa Zambi 1970

Kuchichimieka ni kusakwilila

¹ Aa Zambi, chinalite yetu kukuchichimieka mu Zione, ni kumanununa yilakenyo yetu,

² mumu wakukumbulula ku kulemba cha atu. Kuma kweswe atu kumeeza kuli yena

³ mumu ha shili yo. Shili yetu yaakutukumba alioze yena wakutukonekena,

⁴ Kawaha atu waze yena wakutongola, waze wakwanda hanga atwame mu zuwo lie. Mutuwahilila ni yiwape ya mu zuwo lie lia chijila.

⁵ Yena Zambi, wakutukumbulula muze wakutukwasa kukumba, wakutulingila yikomokeso muze wakutulamwina. Akwa hashi eswe chibwe kaali kusuku, chibwe muze musali lia tulunga lwiji kaakujikijila hali yena.

⁶ Walwezele ndundo je muze wasele milundu muma liayo.

⁷ Wakuholesa chizungozungo cha tulunga lwiji, ni chizungozungo cha miavu yo, ni chizungozungo cha atu.

⁸ Akwa hashi eswe kaakulishimwoka, mumu ha yikomokeso yize hiunalingi. Yitanga ye yakuwahilisa atu chize ku chichamene ndoo ku chingoloshi.

⁹ Wakufunga che chifuchi muze wakunokesa vula; wakuchipwisa cha chinuno. Wakuzalisa njiji ni meya; wakusokesa mbuto hashi. Wakuchilinga ngwe chino:

¹⁰ wakunokesa vula mu minda yize atu haalima; wakutuchikisa hashi ni kukekemesa mavu ni vula, wakusokesa yibuta.

¹¹ Ku utu we wakwimisa mbuto yinji! Kweswako mwoya mihuko yinji yakubwa ko.

¹² Mu yambu yimuna anji alimo, ha milundu hali uwahililo.

¹³ Mu puya mapanga hooka, yikulo hiyazala ni tiriku. Akwa chifuchi eswe kaanawahilila ni kwimba.