Miaso (Masamu) 62 - Mukanda Wa Zambi 1970

Zambi kakungufunga

¹ Ngunashimbwila Zambi angulamwine, ngunashachila hali iye wika.

² Iye wika kali liwe liami kanda chilamwina chami; kali chiswamo chami; akwa kole jami keechi kungukumba nichimwe.

³ Ndoo mwiji muka munwecha kulundumukina mutu yoze halimbuka ngwe chipanga, hanji mbango yize hiyabuzuka?

⁴ Nwakuzanga lume kunguchiza ku muhela ulemu, nwakuwahilila ni kuhanjika mahuza. Nwakungulemesa ni kanwa alioze mu mbunge nwakungushinga.

⁵ Ngunashachila hali Zambi wika, nakusa mbunge yami kuli iye.

⁶ Iye wika kali liwe liami kanda chilamwina chami; kali chiswamo chami; akwa kole keechi kungukumba nichimwe.

⁷ Ulamwino ni ulemu wami yili mu moko ja Zambi, iye kali liwe liami lia tachi, kali chiswamo chami.

⁸ Atu jami, shachilenu hali Zambi matangwa eswe! Mulwezenu lamba lienu heswe, mumu kali chiswamo chetu.

⁹ Atu kaali lume ngwe fuji yamokomoko, atu alemu ni alelu eswe aali kaali amokomoko, achaapezale, muwaamona alelu lume, fuji yili kama ngwe yilemu.

¹⁰ Kanda nushachila ha yuma ya mbenga, kanda nusa mbunge ku yiwape yize munutambula ku wiji; chibwe ubite muwoka, kanda nusako mbunge.

¹¹ Te hinevwa kulu yisuho yimwe Zambi mamba ngwenyi, ndundo jili nijenyi,

¹² ni zango lienyi kulishi kuhwa. Aa Mwene Zambi, yena mwene wakufweta mutu mweswe nikulita ni yitanga yenyi.