Miaso (Masamu) 60 - Mukanda Wa Zambi 1970

Kulemba: “Mwene Zambi ngulamwine kama”

¹ Zambi hiwatumbila, hiwatukumba, hiwatutenukina, alioze haliabwila hiluka kama nawa kuli yetu.

² Hiwachikimisa chifuchi, hiwachibula mwaji, haliabwila chiwuke, mumu chinafu!

³ Hiwatumwesa lamba linji, twakutalinga ngwe mutu yoze hazenga walwa.

⁴ Hiwatoweza atu waze akukuvwila woma, hanga keechi kubwa mu uhiso.

⁵ Tulamwine ni ndundo je, kumbulula kama kulemba chetu, hanga utupulule yetu waze wakuzanga.

⁶ Zambi, mu zuwo lienyi, hanambe ngwenyi: “Yami, mukwa kukumba, mungukatetela atu jami limbo lia Shekeme, ni chikulo cha Sukote.

⁷ “Yifuchi ya Gileade ni Manase yili niyami, chifuchi cha Efraime chili chifulu chami cha jita, chifuchi cha Yuda chili lukanda wami wa wanangana.

⁸ Alioze chifuchi cha Moabe muchikabwa mbashila yami ya kusanyina, Mungusa sapato jami mu chifuchi cha Edome ngwe chilayi chize chinalumbunuka ngwo, nichami. Kuma Afilistia kaakunyonga ngwo, maatukumba, nyi?”

⁹ Aa Zambi, iya mangunjisa mu lie limbo lia kukoleka? Iya mangutwala kama ku chifuchi cha Edome?

¹⁰ Kuma chamwenemwene hiunatwehuka, nyi? Kuuchi kutuhuka hamwe ni tujita twetu, nyi?

¹¹ Tukwase kama twase jita ni akwa kole jetu; mumu kukwasa cha atu chili chamokomoko.

¹² Hamwe ni yena, Zambi, mutulinga kanawa; mutukumba akwa kole jetu!