Miaso (Masamu) 59 - Mukanda Wa Zambi 1970

Kulemba: “Zambi ngufunge kama”

¹ Zambi yami, ngulamwine kama kuli akwa kole jami, ngufunge kama kuli waze akungukatukila.

² Ngupulule kama kuli yingulungulu, ngulamwine kama kuli akwa kushiha atu!

³ Tala! Kaanangujingilika angushihe, kaali yiswii waze analikungulula alimike ni yami. Alioze chalingile kwami Chuma nichimwe.

⁴ Aa Mwene Zambi, chavulumwine kwami; chibwe chocho kaanazomboka fuji ku yiswamo yo.

⁵ Mwene Zambi, Mukwa Ndundo Jeswe, katuka, tweya ungukwase kama; Zambi ya Aisraele, chitale yena mwene! Katuka umwese akwa mavungu lamba; kanda weevwila keke, kaali yingulungulu!

⁶ Kaakuhiluka ku limbo chingoloshi, kaakuchingashana, kaakukenana ngwe tuwa mu limbo.

⁷ Banjika ku matuka jo ni kuhala cho, malimi jo kaali ngwe mikwale, hindu kaakulihula ngwo: “Iya matwivwa?”

⁸ Alioze yena, Mwene Zambi, wakwaseha, wakukekuna akwa mavungu eswe.

⁹ Aa Zambi, nakushachila ha ndundo je, yena uli chiswamo chami.

¹⁰ Zambi yami kakunguzanga, kumeza kuli yami, kumatayiza ngumone chize makumba akwa kole jami.

¹¹ Zambi, kanda washiha haliabwila, kuchina atu jami maavulama. Amwange ni tachi je, akumbe, Mwene Zambi lukebwe wetu.

^12-13 Kaakuvulumuna ni makanwa jo, maliji jo eswe kaali abi, akwachike mu kulengumuka cho! Ashihe ni ufwatulo we, ashihe liakulu. Mumu kaakushingana ni kwonga atu. Mba atu eswe anyingike ngwo, yena Zambi wakuyula Aisraele, wakuyula hashi heswe.

¹⁴ Akwa kole jami kaakuhilwoka ku limbo chingoloshi, kaakuchingashana, kaakukenana ngwe tuwa mu limbo.

¹⁵ Kaakulihiza ha kufupa yakulia, nyi kaakuchile kaakukenana.

¹⁶ Alioze yami mungukwimbila hakutwala ku ndundo je, mungubwa nikwimba ni tachi ha chichamene cheswe, hakutwala ku zango lie lize kulishi kuhwa. Mumu uli ngwe zuwo liami lisuku lia kukoleka kanda chiswamo chami ha matangwa ja lamba.

¹⁷ Mungwimba ni kukuhalisa yena tachi jami, Zambi chiswamo chami, wakunguzanga.