Miaso (Masamu) 58 - Mukanda Wa Zambi 1970

Kulemba: “Zambi mwesa yivulumunyi lamba”

¹ Yenu miata nwakubatula ni umwenemwene, nyi? hanji nwakubatwila atu eswe chimuwika, nyi?

² Ka! Nwakunyonga lume yibi yize nwakuhasa kulinga, nwakushiha shiha atu mu chifuchi.

³ Yingulungulu kaakuhungumioka mu mwono wo weswe, milimo yo shina mafwefwe chize ku kusemuka cho.

⁴ Haanazala ni ulembe ngwe manoka, kaakujika matwi jo, ngwe lunoka, fwijameya, yoze hafwa matwi.

⁵ Yoze keshi kwivwa liji lia yoze mamulembejeka, chibwe miaso ya tufutafuta.

⁶ Aa Zambi, bukula kama mazo jo! Wonda mbangachi ja tambwe a mievu.

⁷ Atoke kama ngwe meya waze hooma, afwenyoke ngwe yambu ya mu jila.

⁸ Abwe ngwe kashitu yoze majila mu mavu, kuuchi kumumona nawa; abwe ngwe mwana wa kuselumuna, yoze kamwene tangwa.

⁹ Shimbu kanda achichinyingika, Zambi maanungwina hashi ngwe mutondo, maafuza ni mwiku wenyi, muze te achili ni tachi.

¹⁰ Akwa ululi maawahilila muze maamona lamba lia yivulumunyi, kumeenda mu manyinga ja yingulungulu.

¹¹ Atu maamba ngwo: “Chamwenemwene akwa ululi kumaakundulula. Chamwenemwene Zambi kwali, yoze wakubatwila akwa hashi!”