Miaso (Masamu) 57 - Mukanda Wa Zambi 1970

Kulemba: “Mwene Zambi ngukwase kama”

¹ Aa Zambi, nguvwile kama keke, nguvwile kama keke, mumu hinachinyina kuli yena. Munguswama mu mapulwa je, ndoo muze chijimbi hichabalika.

² Ngunatete kuli Zambi Mukwa Mwilu Mwahiana, Zambi yoze wakulinga yibema.

³ Muze mwilu kumataa, mangulamwina; kumakumba akwa kole jami. Zambi mangulweza umwenemwene wenyi ni zango lienyi, lize kulishi kuhwa.

⁴ Akwa kole kaakungujikinyina ngwe tambwe, mazo jo kaali ngwe makunga ni mivwi; malimi jo kaambuka ngwe mikwale ya jita.

⁵ Aa Zambi, solola unene we kuze kwilu, ni uhenya we hashi heswe.

⁶ Akwa kole haangutela Wanda; woma unji ngunevu, ngunanenganyana mu mbunge. Haangufulila wumbu mu jila yami, alioze haaholokela mo ene.

⁷ Aa Zambi, ngunashachila hali yena; mungukwimbila ni kukuchichimieka!

⁸ Mbunge yami jikiza! Tulialia twami hanjikenu! Munguvumbula lie tangwa.

⁹ Aa Mwene Zambi, mungukufumanyisa hakachi ka mavungu! Mungukwimbila ni kukuchichimieka ku meso ja atu!

¹⁰ Zango lie lize kulishi kuhwa liakuheta ndoo mwilu; umwenemwene we ndoo ku malelwa.

¹¹ Aa Zambi, solola unene we kwilu, ni uhenya we hashi heswe.