Miaso (Masamu) 56 - Mukanda Wa Zambi 1970

Zambi, ngunashachila hali yena

¹ Aa Zambi, nguvwile kama keke, mumu atu kaakungukatukila, akwa kole kaakunguhungumiona matangwa eswe.

² Kaakulimika ni yami tangwa Heswe, akwa kulitachika ni yami kaali anji.

³ Aa Mwene Zambi, Mukwa Ndundo Jeswe, nyi mungwivwa woma, mungushachila hali yena.

⁴ Nakushachila hali Zambi, chishi kwivwa woma, nakumuchichimieka ha chize angulakenyene. Mwe mutu, yika mangulinga?

⁵ Akwa kole jami kaakungubinjisa, tangwa lieswe kakungunyongena lume manyonga abi.

⁶ Kaakulikungulula ni kuswama hamuwika, kaakutala yeswe yize nakulinga hanga ahase kungushiha.

⁷ Aa Zambi, amwese kama lamba mumu ha yibi yo, akumbe kama ni ufwatulo we.

⁸ Yena Unanyingika lamba lize nakumona, wakumona chize nakulila. Kuyasonewene mu mukanda we, nyi?

⁹ Tangwa lize mungukutambika, akwa kole jami maahiluka unyimenyime. Ngunanyingika ngwami, yena Zambi uli hamwe ni yami!

¹⁰ Nakukuchichimieka mumu ha yilakenyo ye.

¹¹ Nakushachila hali yena, chichi kwivwa woma. Mwe mutu, yika mangulinga?

¹² Aa Zambi, mungukulambula milambu yize nakulakenyene, mungukwaha milambu ya kusakwila,

¹³ mumu hiunangulamwina ku kufwa, wangukwashile, kuchina akwa kole maangukumba. Kashika nakwenda ku meso ja Zambi mu pangu lize liakupanguka hali akwa mwono.