Miaso (Masamu) 55 - Mukanda Wa Zambi 1970

Kulemba cha umwe lunga yoze te sepa lienyi hamukunjika kuli akwa kole jenyi

¹ Aa Zambi, banjika kama kuliumba chami, kanda ungumba nyima.

² Ngubanjike kama ungukumbulule, ngunahape chinji ni yibikalo yami.

³ Ngunevu mwongo ha kuhala cha akwa kole jami, yingulungulu kaakungumwesa lamba kuhiana. Kaakungubinjisa, kaakungutenukina, kaakunguvutwokela.

⁴ Ngunevu woma, mwongo wa kufwa hiwangukwata.

⁵ Ngunachikima ni woma, mwongo hiwangushata.

⁶ Nyi nabwile kama ni mapulwa ngwe kajila, kachi te munguhumuka nguye kusuku, nguhwime kama.

⁷ Kachi nguye kwami ni kutwama mu puya,

⁸ kachi ngufupe kama nikawashi kuma kwa kuswama, ni kuchina chijimbi ni kangonga.

⁹ Aa Mwene Zambi, binjisa kama maliji jo! Ngunamono kulitachika ni kushiha mu limbo,

¹⁰ uhenge ni uhuka ufuku ni mwalwa.

¹¹ Kweswe shina kwonona; kubinjisa ni kwonga kuyishi kuhona mu mikala.

¹² Nyi te mukwa kole wakunguseha, kachi nalihumikijine, nyi te mukwa kulimika ni yami malifuza ku meso jami, kachi naswamine.

¹³ Alioze yena uli mukwetu, uli sepa liami munene.

¹⁴ Yena ni yami te twakuta pande kanawa, te twakuya nawa hamwe ni atu akwo ku zuwo lia Zambi.

¹⁵ Akwa kole jami afwe kama susumuku; apalumuke kama muma lia afu! Yibi kaali nayo mu mbunge jo ni mu mazuwo jo.

¹⁶ Alioze yami nakulemba Mwene Zambi angukwase, neye kumangulamwina.

¹⁷ Ha chichamene, ni ha mwalwa, ni ha ufuku mungulinyenga ni kutwa mikuma, neye kumevwa liji liami.

¹⁸ Kumanguhilwisa kanawa ku zuwo liami, muze munguya mu jita, chibwe akwa kole jami oka naye.

¹⁹ Zambi yoze wakuyula ku miaka yeswe, mangwivwa, maakumba; mumu kaasolo kwalumuka, keeshi kumwivwila woma.

²⁰ Yoze wabwile sepa liami hatangu yalimika ni masepa jenyi, yashiha Usendo wo.

²¹ Kanwa lienyi yiliyema kuhiana ngwe yamwa, alioze mu mbunge yimuzala ni kole, Maliji jenyi koovula ngwe maji, alioze yaalemeka ngwe mukwale.

²² Kunjika yibikalo ye kuli Mwene Zambi, neye makufunga; kechi kutayiza mukwa ululi kukokoloka.

²³ Alioze akwa kumwanga manyinga ni akwa mahuza, yena Zambi muukaalundumwina muma lia afu muze kanda achiheta hakachi ka matangwa jo. Alioze yami ngunashachila hali yena.