Miaso (Masamu) 52 - Mukanda Wa Zambi 1970

Ubatwilo wa Zambi ni utu wenyi

¹ Yena chitakame, kuchi wakulisamba ni yibi ye? Zango lia Zambi kulishi kuhwa.

² Wakufupa mana a kwonona atu akwo; kanwa lie lili ngwe tewula yambuka. Wakuhanjika mahuza matangwa eswe.

³ Yena wakuzanga yibi hi yibema ko, wakuzanga mahuza hi umwenemwene ko.

⁴ Yena samahuza, wakuzanga kumwesa atu lamba ni mafwefwe je.

⁵ Kashika Zambi makakwonona liakulu, makakukwata, makakutuhwisa mu zuwo lie, makakuchiza hano hashi.

⁶ Akwa ululi kumaakachimona, kumaakevwa woma, kumaakakuseha ngwo:

⁷ “Talenu yono lunga kashachilile ko hali Zambi, alioze yashachila ha ubite wenyi, yanyonga ngwenyi, yibi yenyi muyimwaha uhwimino.”

⁸ Alioze yami nguli ngwe mutondo wa olive, uze uli hehi ni zuwo lia Zambi, nakusa mbunge ku zango liahiana lia Zambi ndoo ku miaka yeswe

⁹ Zambi, mungukusakwilila matangwa eswe ha yize walingile; mungukwambujola ku meso ja atu je ngwami, yena uli mubema.