Miaso (Masamu) 51 - Mukanda Wa Zambi 1970

Kulemba: “Mwene Zambi ngukonekene kama”

¹ Aa Zambi, nguvwile kama keke, mumu ha zango lie lize kulishi kuhwa. Jimuna kama milonga yami, mumu ha keke ye yinji.

² Ngusanyise liakulu ku uhenge wami, ngubemese kama ku shili yami!

³ Ngunanyingika milonga yami; matangwa eswe Chishi kuvulama shili yami.

⁴ Yena nakuvulumwine, yena wika, nalingile yuma yize wakubihilila. Kashika yena unasambe ha kungubatwila, unalingi ni ululi ha kunguhisa.

⁵ Nguli kwami mutu mubi chize ku kusemuka chami; chize ku kuseseka chami mu jimo lia mama nguli lume mukwa shili.

⁶ Yena wakuzanga umwenemwene wa mu mbunge, ngwehe kama mana je.

⁷ Nguchize kama shili yami hanga ngubeme, ngusanyise hanga ngubeme kuhiana.

⁸ Ngukwase kama kwivwa nawa maliji a uwahililo; chibwe hiwanguwonda hindu munguwahilila nawa.

⁹ Kanda utala milonga yami, ujimune uhenge wami weswe.

¹⁰ Aa Zambi, ngwehe kama mbunge yibema, mbunge yaha, yize yamwenemwene.

¹¹ Kanda ungumbila ku meso je, kanda unguchiza Mwiku we wa linanga.

¹² Ngwehe kama nawa uwahililo wa ulamwino we, ngukolese, ngukwononokene.

¹³ Mba mungulongesa yivulumunyi Shimbi je, hanga atewulukile kuli yena.

¹⁴ Aa Zambi, chilamwina chami, ngulamwine kama ku kufwa, mba mungwambujola ululi we ni uwahililo.

¹⁵ Mwene Zambi, ngukwase kama ha kuhanjika, mba mungukuhalisa.

¹⁶ Yena kuushi kuzanga milambu; nyi wakuyizanga, kachi nakukwaha yo. Yena kuushi kuwahilila ni milambu ya kwocha.

¹⁷ Aa Zambi, mulambu wami uli mbunge ya kulikehesa; yena kuushi kulelesa mbunge ya kulikehesa ni ya chinyengo.

¹⁸ Aa Zambi, linga kama kuli akwa Zione; tungulula yipanga ya limbo lia Yerusaleme.

¹⁹ Ha chino, mba muwahilila ni milambu yeka ni yeka, milambu yeswe ya kwocha; makuji a ngombe maalambula ha chilumbilo.