Miaso (Masamu) 50 - Mukanda Wa Zambi 1970

Kuwayila cha umwenemwene

¹ Mwene Zambi, Zambi Mukwa Ndundo Jeswe kanahanjika, kanatambika akwa hashi eswe, chize ku chivumbuko ndoo ku chitokelo.

² Zambi kakubeyima ngwe tangwa ku Zione, limbo lia uhenya kuhiana.

³ Zambi yetu kaneza, alioze keshi kuhola, kahia kanalekwoka kulutwe lienyi, chijimbi chinamujingilika.

⁴ Kanatambika lilu ni hashi ngwe yela jenyi, amumone chize mabatwila atu jenyi.

⁵ Kanambe ngwenyi: “Kungululenu atu jami hamuwika, waze haanakolesa Usendo ni yami ha kungulambula milambu.”

⁶ Lilu linambujola ngwo, Zambi kali mukwa ululi, mwe chibatula milonga.

⁷ “Banjikenu atu jami, munguhanjika, mungunushindakenya yibi yenu, Aisraele. Yami nguli Zambi, Zambi yenu.

⁸ Chichi kunuhisa hakutwala ku milambu yenu ya kwocha ni milambu yikwo, yize nwakungulambula tangwa ha tangwa.

⁹ Alioze ngwami, Chishi ni chikala cha makuji a ngombe, ni makuji a mapanga a ku matanga jenu,

¹⁰ mumu tushitu eswe a mu musenge, ni tununu twa ngombe waze ali ha milundu niami,

¹¹ ni tujita eswe a ha milundu niami, ni yuma yeswe ya mu minda niyami.

¹² “Nyi nevwile zala te chichi kunulweza, mumu hashi ni yuma yeswe yize yiliho yili niyami.

¹³ Kuma nakulia yifwo ya ngombe, hanji nakunwa manyinga ja pembe, nyi?

¹⁴ Lambulenu Zambi milambu ya kusakwila, manununenu yilakenyo yenu yeswe kuli Mukwa Ndundo Jeswe.

¹⁵ Ngutambikenu ha tangwa lia lamba; mungunupulula, mba mununguchichimieka.”

¹⁶ Alioze Zambi kanahula yingulungulu ngwenyi: “Mumu yika yenu nwakwambujola Shimbi jami? Kuchi mba nwakuhanjika hakutwala ku Usendo wami?

¹⁷ Ngwami, nwakulituna kufumba chami, nwakwehuka Shimbi jami.

¹⁸ Nwakulikata ni eji eswe waze nwakumona, nwakulifutula ni yitanji.

¹⁹ “Matangwa eswe nwakululika ni kuhanjika yibi, kunushi kwivwa sonyi ha kuhanjeka mahuza.

²⁰ Nwakulimika chibwe ni usoko wenu, nwakulamikiza chibwe ana ja anoko waze nwasemukine no.

²¹ Muze nwalingile yuma yino yeswe, yami Chambile ko nichimwe, Ha chino nwangumwene ngwe nguli mukwenu. Alioze haliabwila ngunanubajila, ngunanulumbunwina yuma yeswe.

²² “Banjikenu yenu waze nwakungulelesa, nyi ka, mungunwonona; kukushi niumwe yoze manulamwina.

²³ Yoze mangulambula milambu ya kusakwila, mwenawo unangulemesa; yoze mangwononokena, chamwenemwene mungumulamwina.”