Miaso (Masamu) 5 - Mukanda Wa Zambi 1970

Kulemba: “Mwene Zambi ngufunge kama”

¹ Aa Mwene Zambi nalemba, ivwa kama maliji jami ni kulinyenga chami.

² Zambi yami, mwanangana wami. Banjika kuteta chami, ngukwase kama! Aa Mwene Zambi, ngunalembe kuli yena;

³ ha chichamene muwivwa liji liami; ha chichamene mungulemba kuli yena, ni kushimbwila kumbululo lie.

⁴ Yena hiuli Zambi ko yoze wakuwahilila mu ungulungulu, kuushi kutayiza yibi ku meso je.

⁵ Kuushi kutayiza akwa kulengumuka kumana ku meso je, wakuvutwokela yingulungulu.

⁶ Wakwonona akwa mahuza eswe, wakuvutwokela akwa kushiha atu ni akwa kwonga.

⁷ Alioze yami, ngunahase kunjila mu zuwo lie, mumu ha zango lie lize kulishi kuhwa. Ngunahase kutalikisa ku zuwo lie lia chijila, ni kufukama ku meso je nikukulemesa.

⁸ Mwene Zambi, yena uli mukwa kushishika, ngusongwele kama mumu hali akwa kole jami ngululikile kama jila ye kulutwe liami.

⁹ Yize akwamba akwa kole jami hi yamwenemwene ko, milimo yo shina kwonona. Kaakubebieka atu ni maliji jo; miliwu yo yili ngwe mafuka awashi.

¹⁰ Aa Zambi, ahise, alimbwise ku manyonga jo abi. Ahume ku meso je mumu ha yibi yo yinji, mumu haanakukatukila.

¹¹ Alioze eswe waze akuswama muli yena awahilile, akololoke ni kulikwiza matangwa eswe. Funga waze akukuzanga; kaakuwahilila mumu hali yena.

¹² Mwene Zambi kuwakuwahisa waze akukwononokena; utu we wakwafunga ngwe lukebwe.