Miaso (Masamu) 49 - Mukanda Wa Zambi 1970

Uhepuke wa kushachila ha ubite

¹ Banjikenu atu eswe a kuma kweswe;

² anene ni akepe, pichi ni yiswale, banjikenu!

³ Yuma yize ngunanyongo ni yize ngunahanjika yili ya mana.

⁴ Munguta yishima, ni kuyilumbununa muze ngunembi kalialia.

⁵ Chichi kwivwa woma ha matangwa a lamba, muze akwa kole akungujingilika,

⁶ atu abi waze akusa mbunge ku ubite wo. Ni kulifuza ha kulumbama cha yuma yo.

⁷ Mutu kahashile kulipulwila iye mwene; keshi ni ubite wa kulanda mwono wenyi kuli Zambi,

⁸ mumu ndando ya mwono yili yinji kuhiana. Ubite uze mutu mahasa kufweta kuuchi kuzuka,

⁹ ha kuchina kufwa, akatwame ni mwono ndoo ku miaka yeswe.

¹⁰ Mutu mweswe mahasa kumona ngwenyi, akwa mana no kaakufwa, chimuwika ni yihepuke ni waze keeshi mana. Eswe kaakuhichika ubite wo ni vungu lio.

¹¹ Ku mafuka mukubwa ku mahio matangwa eswe, mwenamo maabwa ndoo ku miaka yeswe, chibwe abwile ni yifuchi yo ene hatangu.

¹² Lufuma munene wa mutu kahashile kumulamwina ku kufwa; kumafwa ngwe kashitu.

¹³ Nuchitala waze akulifuliela ene, achinyongenu songo lia atu waze akuwahilila ni ubite.

¹⁴ Kumaafwa ngwe mapanga; kufwa muchikabwa kafunga ko, akwa ululi kumaakumba; mijimba yo muyibola nikawashi muma lia afu, kusuku ku chifuchi cho.

¹⁵ Alioze Zambi mangulamwina, mangupulula ku tachi ja kufwa.

¹⁶ Kanda wivwa kubiha muze mutu mabwa pichi, muze ubite wenyi hiwoka,

¹⁷ mumu, muze hafwa kechi kuya nawo, ubite wenyi kuuchi kumukaula muma lia afu.

¹⁸ Chibwe mutu kanawahilila mu mwono wenyi, chibwe atu kaanamuchichimieka mumu ha ubite wenyi,

¹⁹ hindu kumakaula tushakulu twenyi waze haanafu, kuze milima kuyishi kuhwa.

²⁰ Lufuma munene wa mutu kahashile kumulamwina ku kufwa, kumafwa ngwe kashitu.