Miaso (Masamu) 48 - Mukanda Wa Zambi 1970

Zione lie limbo lia Zambi

¹ Mwene Zambi kali munene, atu amufumanyise mu limbo lienyi ha mulundu wa chijila.

² Zione, mulundu wa Zambi, uli usuku ni Ubema kuhiana, limbo linene lia mwanangana liakuwahilisa akwa hashi eswe!

³ Zambi kanalwezana ngwenyi, uchinyino uli muli iye, mu lie limbo liakukoleka.

⁴ Mianangana haanalikungulula hamuwika, haaneza ni kwasa jita ni akwa mulundu wa Zione.

⁵ Alioze muze amwene Zione, yaalishimwoka, yeevwa woma, yaachina.

⁶ Yaachikima ni kungangama, ngwe pwo yoze unambe kusema,

⁷ ngwe mato a ku chau cha Tarshishi akubalwola, ni fuji yinji ya ku chivumbuko.

⁸ Twevwile hakutwala ku yuma yize alingile Zambi, haliabwila hitwayimona mu limbo lia Zambi yetu, Mwene Zambi Mukwa Ndundo Jeswe; iye makalifunga ndoo ku miaka yeswe.

⁹ Zambi, nyi ngwe tuli mu zuwo lie, twakunyonga chize wakutuzanga ni zango lize kulishi kuhwa.

¹⁰ Kuma kweswe atu kaakukuhalisa, lufuma we hanafumana kweswe. Wakuyula hashi ni umwenemwene;

¹¹ akwa Zione awahilile! Wakubatwila atu ni ululi, atu awahilile mu membo ja Yuda!

¹² Atu ja Zambi, endangane mu Zione, nwalule mazuwo asuku akukoleka.

¹³ Hengulenu kanawa chipanga chalio, ni mazuwo jalio akukoleka, mba hanga nukahase kwambulwila ana jenu ngwenu:

¹⁴ “Zambi yono kali Zambi yetu ndoo ku miaka yeswe ni miaka yeswe, kumatusongwela matangwa eswe.”