Miaso (Masamu) 47 - Mukanda Wa Zambi 1970

Mwanangana Wahiana eswe

¹ Yenu mavungu eswe sakwilenu ni uwahililo ni moko jenu! Halisenu Zambi nikwimba miaso ni tachi!

² Mwene Zambi Mukwa Mwilu Wahiana kanda Kola Woma, kali mwanangana munene, kakuyula akwa hashi eswe.

³ Mwe wakutuzeyesela atu eka ni eka; kakutukwasa kuyula mavungu akwo.

⁴ Hanatutongwela chifuchi muze twatwama, chili chihinga cha uhenya cha atu jenyi waze akuzanga.

⁵ Zambi kanayi atwame ha chitwamo chenyi cha wanangana, muze anayi atu kaanakololoka nikwimba yitavwi.

⁶ Imbenu nikuhalisa Zambi; imbenu nikuchichimieka mwanangana wetu!

⁷ Zambi kali mwanangana wa akwa hashi eswe, muhalisenu ni miaso!

⁸ Zambi kakutwama ha chitwamo chenyi cha chijila, kakuyula mavungu.

⁹ Akwa kuyula ja mavungu kaanalikungulula, hamwe ni atu ja Zambi ya Abrahama. Mwe Zambi kali ni tachi kuhiana tujita eswe, iye wakuyula hashi heswe!