Miaso (Masamu) 46 - Mukanda Wa Zambi 1970

Zambi kali hamwe ni yetu

¹ Zambi kali uchinyino wetu ni tachi jetu, kanalulika matangwa eswe ni kutukwasa muze twakumona lamba.

² Ha chino kutuchi kwivwa woma, chibwe mavu anyike, chibwe milundu yilimbile mu kalunga lwiji,

³ chibwe tulunga lwiji maabinda ni kututumuna fulufulu, chibwe milundu muyinyika.

⁴ Kukuli umwe lwiji yoze wakuwahisa akwa limbo lia Zambi, akwa zuwo lia chijila lia Zambi Mukwa Mwilu Mwahiana.

⁵ Zambi kali mu limbo, atu keechi kulionona; ha chichamene kumeza ni kwakwasa.

⁶ Akwa mavungu kaanevu woma, mawanangana kaananyiki, Zambi kanakulunguza, hashi hanasangunuka.

⁷ Mwene Mukwa Ndundo Jeswe kali hamwe ni yetu; Zambi ya Yakoba kali uchinyino wetu!

⁸ Tweyenu numone yuma yize alingile, yuma ya kulishimwoka yize alingile hano hashi!

⁹ Kakuholesa jita hashi heswe, kakumakwona mata, kakubatwola makunga, kakwochacha kebwe!

¹⁰ Kanambe ngwenyi: “Litwaminenu kubinda, nyingikenu ngwenu, yami nguli Zambi; nakuyula mavungu, nakuyula akwa hashi eswe.”

¹¹ Mwene Zambi Mukwa Ndundo Jeswe kali hamwe ni yetu, Zambi ya Yakoba kali uchinyino wetu!