Miaso (Masamu) 45 - Mukanda Wa Zambi 1970

Umbachiso wa mwanangana

¹ Nguli ni manyonga abema, muze ngunasonekena mwanangana mwaso uno. Kanwa liami lili ngwe sonekeso ya mutu yoze wanyingika kusoneka kanawa.

² Kuwabema kuhiana malunga akwo eswe, kuwanyingika kuhanjika kanawa, Zambi wakukuwahisa matangwa eswe!

³ Swelela mukwale we, mwanangana wa tachi, uli ni uhenya ni ulamba!

⁴ Nyina ha kavwalu, uye ni ulamba we ha kukumba, uye ni kwasa jita mumu ha ululi ni umwenemwene! Muukumba kanawa mu jita ni tachi je!

⁵ Mivwi ye kuyambuka, kuyakutuwa akwa kole je; mavungu kaakufulamana ku molu Je.

⁶ Wanangana uze akuhele Zambi, muulinduluka ndoo ku miaka yeswe ni miaka yeswe. Wakuyula Wanangana we ni ululi.

⁷ Wakuzanga umwenemwene, wakuvutwokela ungulungulu. Kashika Zambi, Zambi ye, hanakutongola, hanakuwahilisa kuhiana mianangana akwo eswe.

⁸ Mahina je kaakukupuka vumba libema lia yuma yino: mira, ni yilombo, ni kasia, atu kaakukwimbila tulialia mu mazuwo akwola ni mazo a njamba.

⁹ Ana ja mianangana kaali mukachi ka mapwo waze atwama mu zuwo lie lia wanangana. Ku chindume cha chitwamo che, mwazovu we kanamana nikuzala yingeliengelie yeka ni yeka ya oru yibema.

¹⁰ Nandungi wa mwanangana, banjika yize ngunambe: “Kanda usa mbunge kuli atu je ni kuli usoko we.

¹¹ Mwanangana kanakuzange mumu ha ubeme we; kali mwene we, kashika chatamba kumwononokena.

¹² Akwa limbo lia Tiru maakunehena yawana, pichi maakufupa hanga walingile yibema.”

¹³ Mwana pwo wa mwanangana kali mu zuwo lia mwanangana, ayenwe cho kubema! Hina lienyi liakutunga ni oru.

¹⁴ Kaanamutwala maha mwanangana nikuzala hina lienyi libema. Masepa jenyi kaanamushinjikiza ndoo ku zuwo lia mwanangana.

¹⁵ Kaananjila maha mwanangana ni uwahililo weswe.

¹⁶ Mwanangana wami ana anji a malunga muukabwa no, akahinge tushakulu twe, muukaapwisa mianangana ja yifuchi yeswe ya hashi.

¹⁷ Mungukuhalisa ni mwaso wami ndoo ku miaka yeswe, atu eswe maakuchichimieka ndoo ku miaka yeswe.