Miaso (Masamu) 44 - Mukanda Wa Zambi 1970

Kulemba: “Mwene Zambi tufunge kama”

¹ Aa Zambi, hitunevu ni matwi jetu, tushakulu twetu haanatwambulwila yo, yitanga yinene yize walingile ha matangwa ja tushakulu:

² ngwe chize yena mwene wahumine akwa mavungu mu chifuchi cho, yiusalakanyisa mo yetu atu je, ni chize wamwesene mavungu akwo lamba, alioze yiuwahisa yetu atu je.

³ Atu je kaazukile ko chifuchi ni tachi ja mikwale yo, chibwe ni tachi ja moko jo, alioze ku ndundo ja yena mwene; yena wabwile hamwe no mumu te wakwazanga.

⁴ Yena uli mwanangana wami kanda Zambi yami; wakutukwasa yetu atu je tukumbe.

⁵ Ku tachi je twakukumba akwa kole jetu ni kwaliata.

⁶ Chichi kujikijila ha uta wami, chibwe ha mukwale wami ungulamwine,

⁷ mumu yena hiwatulamwina kuli akwa kole jetu, hiwakumba waze te akutuhungumiona.

⁸ Mutukuchichimieka matangwa eswe, ni kukusakwilila ndoo ku miaka yeswe.

⁹ Alioze haliabwila hiwatumbila, hiwatayiza akwa kole jetu kutukumba, kuushi kuya nawa hamwe ni tujita twetu.

¹⁰ Watayijile tuchine akwa kole jetu, no haanabubu yuma yetu.

¹¹ Waatayijile hanga atushihe ngwe mapanga, watumwanginyine mu yifuchi ya yilambala.

¹² Walanjishile yetu atu je ni ndando yikepe; watumwene ngwe tuli atu amokomoko.

¹³ Enyembo jetu haamona yize watulingile, kaakutulenya ni kutukekuna.

¹⁴ Watupwishile Chuma cha mokomoko hakachi ka mavungu, kaakuhunga mitwe ni kutulelesa.

¹⁵ Tangwa heswe nakwivwa sonyi; Chishi kuhasa kuhetuka,

¹⁶ muze nakwivwa matuka ni sau lia akwa kole jami.

¹⁷ Yuma yino yeswe hiyatushata chibwe kutwakuvulamine ko, chibwe kutwashihile ko Usendo uze wakolesele ni yetu.

¹⁸ Hituli ko yihulia, kutwapiasukile ko mu jila ye.

¹⁹ Alioze yena watuhichikile, kutushi tachi mukachi ka tushitu ayilianyi; watuhichikile mu milima kuhiana ngwe hitwafwa.

²⁰ Nyi twalitunyine kuwayila yena Zambi yetu, yituwayila Zambi weka,

²¹ kachi te hiwachinyingika, mumu yena wakunyingika manyonga jetu.

²² Alioze mumu hali yena kaakutushiha tangwa heswe, kaakutukunjika ngwe mapanga waze anambe kushiha.

²³ Mwene Zambi, laula! Kuchi mba uli mu tulo? Katuka! Kanda utumbila ndoo ku miaka yeswe!

²⁴ Kuchi mba unatuswamina? Kanda uvulama lamba lietu ni yihungumiona yetu!

²⁵ Hitwalimbwoka hashi, tunabombo mu fufuta.

²⁶ Twalemba, katuka utukwase! Tulamwine kama, mumu ha zango lie lize kulishi kuhwa!