Miaso (Masamu) 42 - Mukanda Wa Zambi 1970

Mukanda Wa Muchaali ( Mia 42—72 ) Kulemba cha ndungo mu chifuchi cha mbala

¹ Ngwe chize kabaji akuhwimashana ha kufupa meya, Chenacho nawa nakukuvwila yena Zambi usona.

² Nakukuvwila usona yena Zambi ya mwono, tangwa lika munguhasa kuya ni kukuwayila ku meso je?

³ Ufuku ni mwalwa nakuteta, masoji hanabu che kulia chami, akwa kole jami matangwa eswe kaakunguhula ngwo: “Yolihiyo mba mwe Zambi ye?”

⁴ Nakwivwa chinyengo chinji ha kwiwuluka yuma yikulu, muze te nakuya mu mbunga ku zuwo lia Zambi, te nakwasongwela ni kwimbamba, ni kukololoka, ni kuchichimieka Zambi.

⁵ Kuchi mba ngunevu chinyengo chocho? Mumu yika ngunalibikala chichize? Mungusa mbunge yami kuli Zambi, munguchichimieka nawa chilamwina chami kanda Zambi yami.

^6-7 Muno mu undungo mu chifuchi cha mbala nakwivwa chinyengo chinji, kashika nakumwiwuluka. Hangumwesa yinyengo yahiana ngwe hinaula ni miavu ya meya ngwe mahuhwa waze anangufuku, waze akupalumuka ku lwiji Yordau a ku milundu ya Mizare, ni Hermone

⁸ Mwene Zambi angulweze zango lienyi lize kulishi kuhwa tangwa ha tangwa, hanga ngubwe ni mwaso wa kulemba nawo ufuku weswe. Zambi yoze hangwaha mwono.

⁹ Mungwambila Zambi liwe liami ngwami: “Kuchi mba hiwanguvulama? Mumu yika nakumwena lamba ha uswii wa akwa kole jami?”

¹⁰ Ngunevu yinyengo yinji mumu ha kushililika cho; kaakunguhula ngwo: “Yolihiyo mba mwe Zambi ye?”

¹¹ Kuchi mba ngunevu chinyengo chocho? Mumu yika ngunalibikala chichize? Mungusa mbunge yami kuli Zambi, munguchichimieka nawa chilamwina chami kanda Zambi yami.