Miaso (Masamu) 41 - Mukanda Wa Zambi 1970

Kulemba cha mweji

¹ Kawaha yoze wakukwasa yiswale, Mwene Zambi mamukwasa muze iye mwene mamona lamba.

² Mwene Zambi mamufunga, mamuwahilisa mu che chifuchi; kechi kumuhichika mu moko ja akwa kole jenyi.

³ Mwene Zambi mamukwasa muze mabwa ni yikola, mamuhindwisa.

⁴ Nambile ngwami: “Mwene Zambi, hingunakuvulumuna, nguvwile kama keke, unguwuke!”

⁵ Akwa kole jami kaananguyenge ngwo: “Tangwa lika mafwa, hanga jina lienyi litoke liakulu?”

⁶ Atu waze akwiza ni kungumeneka keeshi ni mbunge yimuwika; kaakungulumbila yuma ya saki, ni kuyambujola kuli atu akwo.

⁷ Eswe waze akunguvwila kole kaakunguyenga, kaakungunyongena yuma yibi kuhiana.

⁸ Kaakwamba ngwo: “Musongo wa kufwa hiwamuheta, kechi kuhinduka nawa.”

⁹ Chibwe sepa liami yoze te nakusa mbunge, yoze te nakulia nenyi, neye hangwalumukina.

¹⁰ Mwene Zambi nguvwile kama keke, nguwuke kama, hanga ngulikale kuli akwa kole jami!

¹¹ Ayo keechi kungukumba, mba mungunyingika ngwami, kuma wakungwivwa kuwaha,

¹² Muungukwasa mumu nakulinga yibema, Muungufunga ku meso je ndoo ku miaka yeswe.

¹³ Tuhalisenu Mwene Zambi, Zambi ya Aisraele! Muchichimiekenu chize musono ndoo ku miaka yeswe! Chibwe kama Chenacho! Chibwe kama Chenacho!