Miaso (Masamu) 40 - Mukanda Wa Zambi 1970

Chichimiekenu Mwene Zambi

¹ Te nakumushimbwila ngwami: “Mwene Zambi ngukwase.” Mba yangubanjika, yevwa kuteta chami.

² Yangutuhwisa mu wina wa utoji, yanguchiza mu malowa a kutwema. Yasa molu jami ha liwe, yanguhwimisa.

³ Yangulongesa mwaso Waha, mwaso wa kuchichimieka nawo Zambi yetu. Anji maachimona, maalimuka, Mba mashachila hali Mwene Zambi.

⁴ Kawaha mutu yoze wakusa mbunge kuli Mwene Zambi, yoze keshi kukombelela mahamba, yoze keshi kuwayila mazambi a mahuza.

⁵ Aa Mwene Zambi, Zambi yetu, yena hiunatulingila yikomokeso yinji, kukushi niumwe ngwe yena! Uli ni manyonga anji hakutwala kuli yetu. Chahashile kwaambulula eswe, mumu oka naye.

⁶ Yena kuushi kuzanga yitapo ni milambu, kuushi kuwahilila ni yimuna ya kwocha liakulu, chibwe milambu ya kuchiza nayo shili. Alioze hiunangwehe matwi akukubanjika.

⁷ Kashika natayile ngwami: “Yami uno, yuma yize unambe kungulongesa yili mu mukanda wa Shimbi.

⁸ Zambi yami, nakuwahilila ni kulinga chize unapale! Nakufunga Shimbi je mu mbunge yami.”

⁹ Mwene Zambi, mu Chikungulwila cha atu je nakwambujola ngwami, yena wakutulamwina. Unanyingika ngwe, chichi kuhola.

¹⁰ Chaswekele sango ja ulamwino we mu mbunge yami; matangwa eswe nakwambujola unwenemwene we ni kukwasa che. Chaholele mu chikungulwila cha atu je eswe alioze nambujolele unwenemwene we ni zango lie lize kulishi kuhwa.

¹¹ Mwene Zambi, ngunanyingika ngwami, kuuchi kulitwamina ni kunguvwila keke, Zango lie ni umwenemwene we muyingufunga ndoo ku miaka yeswe.

Kulemba: “Mwene Zambi ngukwase kama”

¹² Lamba lieka ni lieka hiliangujingilika, kuhasa ka kulialula! Uhenge hiwangwoka, hiwangufuka meso, kuhasa kumona ka; unji kuhiana ngwe kambu ja ha mutwe wami, kashika mbunge yami hiyalezumuka.

¹³ Mwene Zambi, ngulamwine kama! Ngukwase kama haliabwila!

¹⁴ Atu waze anafupu kungushiha, evwe sonyi, achingashane! Atu waze akuwahilila mumu ha lamba liami, ahiluke kunyima, evwe sonyi!

¹⁵ Atu waze akunguchoka alekumuke, akwa kole jo aakumbe kama.

¹⁶ Eswe waze akukuwayila awahilile, alikwize. Eswe waze akuwahilila mumu wakwalamwina ambe matangwa eswe ngwo: “Mwene Zambi afumane!”

¹⁷ Aa Mwene Zambi, nguli mulelu kanda chiswale, alioze yena kuwanguvulamine. Yena uli chilamwina chami kanda mukwa kungupulula, aa Zambi yami, tambuka ungukwase kama!