Miaso (Masamu) 39 - Mukanda Wa Zambi 1970

Mukwa lamba yashikisa mulonga wenyi

¹ Nambile ngwami: “Mungutala kanawa yize nakulinga, mungufunga kanwa liami hanga chichi kuhanjika yibi, chichi kwamba nichimwe muze akwa kole haabwa hakamwihi.”

² Naholele kwami kuluu, chahanjikile liji nilimwe, chibwe yuma yibema! Alioze lamba liami hilioka kuhiana,

³ mbunge yami hiyasasaminya. Cheswe nanyongene che ngunalibikala; kashika nahulile ngwami:

⁴ “Mwene Zambi, miaka yingahi mungutwama ni mwono? Mwaka uka mungukafwa? Ngunazange ngunyingike matangwa ja mwono wami.”

⁵ Yena hiwaupwisa wa Chipinji! Mwono wami ku meso je uli ngwe Chuma chamokomoko. Chamwenemwene mwono wa mutu uli ngwe fuji,

⁶ uli ngwe chizulie lume. Yuma yeswe yize akulinga yili yamokomoko; kakulilumbikila ubite, alioze keshi kunyingika yoze mauhinga!

⁷ Mba Mwene Zambi kuli iya mungusa mbunge? Ngunase mbunge yami kuli yena.

⁸ Ngulamwine kama ku shili yami yeswe, kanda utayiza yihepuke kunguseha.

⁹ Mungulihumikiza, chichi kuhanjika liji nilimwe mumu yena hiwangumwesa lamba lino.

¹⁰ Kanda ungumwesa nawa lamba! Himungufwa mumu ha chize wakungulamba.

¹¹ Mutu yoze havulumuna wakumukanyamisa ni kumumwesa lamba wakwonona chuma chize akuzanga iye ngwe ndulu. Chamwenemwene mwono wa mutu uli ngwe fuji!

¹² Mwene Zambi, banjika kuliumba chami, wivwe kama kuteta chami; ngukwase muze ngunalili. Nguli lume ngeji hano hashi ha matangwa akepe ngwe tushakulu twami eswe.

¹³ Ngweche nguchiwahilile kama, shimbu kanda nguchifwa.